Ethereum டோக்கன் ஸ்டாண்டர்ட்களைப் புரிதல்

முக்கியக் குறிப்புகள்

• Ethereum டோக்கன் ஸ்டாண்டர்ட்கள் என்பவை Ethereum-இல் டோக்கன்களை வெளியிடப் பயன்படும், முன்வரையறுக்கப்பட்ட விதிகளும் செயல்பாடுகளும்.

• மிகப் பிரபலமான Ethereum டோக்கன் ஸ்டாண்டர்ட்கள்: ERC-20, ERC-721, ERC-1155.

• ஒவ்வொரு ஸ்டாண்டர்டும் வெவ்வேறு அளவு ஃபன்ஜிபிலிட்டி தருகிறது, அதனால் சாதாரண மற்றும் தனித்துவமான ஆன்செயின் சொத்துகள் இரண்டையும் உருவாக்க முடிகிறது.

• Ethereum சூழல் முழுவதும் டோக்கன் இன்டரோபரபிலிட்டியை ஸ்டாண்டர்ட்கள் சாத்தியமாக்குகின்றன; புதிய டோக்கன்களை dApp-கள் இணைப்பதும், அவற்றை நீங்கள் அணுகுவதும் மிக எளிதாகிறது!

Ethereum டோக்கன் ஸ்டாண்டர்ட்கள் என்றால் என்ன?

Ethereum-இலும் அதன் Layer 2 நெட்வொர்க்குகளிலும் மில்லியன் கணக்கான வெவ்வேறு கிரிப்டோ டோக்கன்கள் உள்ளன; ஒவ்வொன்றுக்கும் வெவ்வேறு பண்புகளும் பயன்பாடுகளும் உண்டு. ஒவ்வொரு டோக்கனையும் இணைக்க உருவாக்குநர்கள் மணிக்கணக்கில் செலவிடாமல், தன் dApp சூழல் முழுவதும் தடையற்ற டோக்கன் ஆதரவை நெட்வொர்க் எப்படி உறுதி செய்ய முடியும்? மணிக்கணக்கான ஆவணங்களைப் படிக்காமல், இந்த டோக்கன்களின் முக்கியப் பண்புகளைப் பயனர்கள் எப்படிப் புரிந்துகொள்வது?

டோக்கன் ஸ்டாண்டர்ட்கள் இதற்குத்தான்!

Ethereum சூழல் முழுவதும் டோக்கன் இன்டரோபரபிலிட்டிக்கு இந்த டெம்ப்ளேட்களும் விதித்தொகுப்புகளும் துணை நிற்கின்றன. அதாவது, ஆயிரக்கணக்கான தனித்தனி டோக்கன்களுக்குப் பதிலாக ஒரு சில பொதுவான டோக்கன் ஸ்டாண்டர்ட்களை மட்டும் dApp-கள் ஆதரித்தால் போதும். உங்களைப் போன்ற எக்ஸ்ப்ளோரர்களுக்கு இதன் பொருள்: ஒரு டோக்கனின் அடிப்படை ஸ்டாண்டர்டைப் பார்த்தாலே, Ethereum முழுவதும் அதன் அடிப்படைத் திறன்களைப் புரிந்துகொள்ளலாம்.

டோக்கன் ஸ்டாண்டர்ட்கள் தீர்மானிப்பவை:

• ஒரு டோக்கனின் ஸ்மார்ட் ஒப்பந்தம் எப்படிக் கோட் செய்யப்பட வேண்டும்.

• அந்த வகையின் ஒவ்வொரு டோக்கனும் ஆதரிக்க வேண்டிய பொதுவான செயல்பாட்டுத் தொகுப்பு, அதனால் எந்த dApp-க்கும் அதை எப்படிக் கையாள்வது என்று தெரியும்.

தற்போது Ethereum-இல் பரவலாகப் பயன்படும் மூன்று டோக்கன் ஸ்டாண்டர்ட்கள் உள்ளன:

1. ERC-20: எளிதாகப் பரிமாறக்கூடிய (அதாவது ஃபன்ஜிபிள்) டோக்கன்களுக்கான ஸ்டாண்டர்ட்.

   எ.கா. USDC மற்றும் UNI டோக்கன்கள்.

2. ERC-721: தனித்துவமான (அதாவது நான்-ஃபன்ஜிபிள்) டோக்கன்களுக்கான ஸ்டாண்டர்ட்; இவை NFT-கள் எனப்படுகின்றன.

   எ.கா. Bored Ape Yacht Club NFT-கள்.

3. ERC-1155: ஒரே ஒப்பந்தத்தில் ஃபன்ஜிபிள், நான்-ஃபன்ஜிபிள் டோக்கன்கள் இரண்டுக்கும் பயன்படும் ஸ்டாண்டர்ட்.

   எ.கா. ஒரு Web3 வீடியோ கேமுக்குள் உள்ள பொருட்கள்.

இப்போது உங்களுக்கு ஒரு கேள்வி எழலாம்: “ஃபன்ஜிபிலிட்டி என்றால் சரியாக என்ன?”

Ethereum சூழலில் இதன் முக்கியத்துவத்தைப் புரிந்துகொள்ள, பாரம்பரியப் பொருளாதாரத்தில் இந்தக் கருத்தை எப்படிப் பார்க்கிறார்கள் என்று பார்ப்போம்.

ஃபன்ஜிபிலிட்டி vs. நான்-ஃபன்ஜிபிலிட்டி

‘ஃபன்ஜிபிலிட்டி’ என்பது ஒரு பொருளாதாரச் சொத்தின் அல்லது பண்டத்தின் பண்பு; இது இரண்டு முக்கியக் கூறுகளைக் காட்டுகிறது:

• சொத்து டிரேட் செய்யப்படும்போது, அதன் அலகுகள் மதிப்பில் எந்த மாற்றமும் இன்றி ஒன்றுக்கொன்று பதிலாகும்.

  ($1 USD-ஐ இன்னொரு $1 USD-ஆகவோ, நான்கு 25¢ காயின்களாகவோ, இருபது 5¢ காயின்களாகவோ மாற்றலாம்.)

• சொத்து பிரிக்கப்படும்போது, சிறிய பகுதிகளும் அதன் அடிப்படைப் பண்புகளைத் தக்கவைக்கும்.

  ($1 USD நான்கு 25¢ காயின்களாகப் பிரிந்தாலும், மதிப்புச் சேமிப்பாகவும் கொள்முதலுக்கும் அது தொடர்ந்து பயன்படும்.)

ஃபன்ஜிபிள் சொத்துகளுக்கு எடுத்துக்காட்டுகள்: எண்ணெய், ஃபியட் நாணயம், அரசுப் பத்திரங்கள், நிறுவனப் பங்குகள். தனித்துவம் இல்லாத இந்தச் சொத்துகளை எளிதாகப் பரிமாற, பிரிக்க முடியும்.

இதற்கு நேர்மாறாக, ‘நான்-ஃபன்ஜிபிலிட்டி’ காட்டுவது:

• சொத்துக்குத் தனித்துவமான பண்புகள் உள்ளன; அவை அதை மற்றவற்றிலிருந்து வேறுபடுத்தி, தனி மதிப்பைத் தருகின்றன.

  (Van Gogh வரைந்த ஓவியத்தின் விலையும், புதிதாக வரும் நவீன ஓவியரின் ஓவியத்தின் விலையும் வேறுபடும்: தோற்றம், அரிதான தன்மை, திறமையின் அளவு, ஓவியத்துக்குப் பின்னால் உள்ள புகழ் ஆகியவற்றால்.)

• பிரிக்கும் செயல் அதன் அடிப்படைப் பண்புகளைப் பாதிக்கிறது.

  (நான்கு துண்டுகளாக வெட்டப்பட்ட ஓவியத்தின் பகுதிகள் ஒன்றுக்கொன்று ஒத்திருக்காது; ஒவ்வொரு பகுதிக்கும் வெவ்வேறு மதிப்பு இருக்கலாம். ஓவியத்தின் ஆரம்ப நோக்கமும் இல்லாமல் போகிறது.)

நான்-ஃபன்ஜிபிள் சொத்துகளுக்குச் சில எடுத்துக்காட்டுகள்: நிலம், கலைப்படைப்பு, டிஜிட்டல் அடையாளங்கள், சான்றிதழ்கள். தனித்துவமான பண்புகள் காரணமாக இந்தச் சொத்துகளைப் பரிமாறுவதும் பிரிப்பதும் கடினம்.

ஃபன்ஜிபிலிட்டி பற்றிக் குழப்பம் வந்தால், உங்களையே இப்படிக் கேளுங்கள்: “இதைப் பரிமாறுவதும் பிரிப்பதும் எவ்வளவு எளிது?” கடினமாக இருந்தால், அது நான்-ஃபன்ஜிபிள் ஆக இருக்கக்கூடும்!

“உலகப் பொருளாதாரத்துக்கான தீர்வு அடுக்காக” ஆவதே Ethereum-இன் இலக்கு. ஃபன்ஜிபிள், நான்-ஃபன்ஜிபிள் சொத்துச் செயல்பாடுகள், பாரம்பரியச் சொத்து வகைகளை ஆன்செயின் பிரதிபலிக்க, புதியவற்றை உருவாக்க வாய்ப்புகளைத் திறக்கின்றன!

ஸ்டாண்டர்ட்களும் டோக்கன் செயல்பாடுகளும்

Ethereum-இல் புதிய டோக்கன் ஒப்பந்தத்தை வெளியிடும்போது, சொத்தை உருவாக்குபவர் ஏற்கெனவே உள்ள டோக்கன் ஸ்டாண்டர்ட்களில் ஒன்றைத் தேர்ந்தெடுப்பார். இது அதற்கு ஆரம்பப் பண்புகளைத் (செயல்பாடுகள் எனப்படும்) தருகிறது: சொத்தின் மொத்த வழங்கல், அதை இன்னொரு வாலெட்டுக்கு மாற்ற முடியுமா என்பது, அது என்ன தகவலை வைத்திருக்க முடியும் என்பது போன்றவை.

எடுத்துக்காட்டாக, ERC-20 இப்படிப்பட்ட செயல்பாடுகளைப் பயன்படுத்துகிறது:

1. totalSupply: ஓர் ERC-20 டோக்கனின் மொத்த வழங்கலை வரையறுக்கிறது.

ஒரு டோக்கனின் மொத்த வழங்கல், அதன் மதிப்பு, விநியோகம் போன்ற முக்கியப் பண்புகளைத் தெரிவிக்கிறது.

2. balanceOf: குறிப்பிட்ட ஒரு முகவரியின் டோக்கன் இருப்பைச் சரிபார்க்கிறது.

நீங்கள் கேட்ட பரிவர்த்தனையைச் செயல்படுத்தும் முன், உங்கள் வாலெட்டின் இருப்பைச் சேவைகளும் தளங்களும் சரிபார்க்க இது உதவுகிறது.

3. transfer: உங்கள் முகவரியிலிருந்து பிற முகவரிகளுக்கு டோக்கன்களை மாற்றுகிறது.

உங்கள் வாலெட்டிலிருந்து இன்னொரு வாலெட்டுக்கு ஒரு கிரிப்டோ டோக்கனை அனுப்பும் ஒவ்வொரு முறையும் transfer செயல்பாட்டைத்தான் பயன்படுத்துகிறீர்கள்.

4. approve: குறிப்பிட்ட தொகை வரை உங்கள் வாலெட் சார்பாகத் தானாகப் பரிவர்த்தனை செய்ய ஒரு முகவரிக்கு (பொதுவாக ஒரு ஸ்மார்ட் ஒப்பந்தத்துக்கு) அனுமதி தருகிறது.

இதைப் பயன்படுத்தி, உங்கள் நிதியில் வரையறுக்கப்பட்ட பகுதியைத் தானாகப் பயன்படுத்திப் பரிவர்த்தனைகளைச் செய்ய ஒரு தளத்துக்கோ சேவைக்கோ அனுமதி அளிக்கலாம்.

5. allowance: ஒரு வாலெட்டிலிருந்து செலவழிப்பவர் எவ்வளவு பரிவர்த்தனை செய்ய முடியும் என்பதை அறியப் பயன்படுகிறது.

நீங்கள் எவ்வளவு அனுமதித்திருக்கிறீர்கள், உங்கள் கையொப்பம் இல்லாமல் பரிவர்த்தனையைச் செய்ய முடியுமா என்று சரிபார்க்க ஒரு தளம் இதைப் பயன்படுத்தலாம்.

டோக்கன் உருவாக்கும் செயல்முறையைத் தரப்படுத்துவது Ethereum சூழலில் கம்போசபிலிட்டியைச் சாத்தியமாக்குகிறது. எடுத்துக்காட்டாக, ஒரு பரவலாக்கப்பட்ட எக்ஸ்சேஞ்சை (DEX) உருவாக்கும் டெவலப்பர், ERC-20 ஸ்டாண்டர்டைப் பின்பற்றும் எந்த டோக்கனுக்கும் ஆதரவைச் சேர்க்கலாம், ஏனெனில் அவை அனைத்தும் ஒரே மாதிரி செயல்படும். பட்டியலிடப்பட்ட ஒவ்வொரு டோக்கனுக்கும் தனித்தனி ஆதரவை உருவாக்க வேண்டியதில்லை.

அதேபோல, ஓர் NFT சந்தையை உருவாக்குபவர், Ethereum-இல் உருவாக்கப்படும் அனைத்து NFT-களையும் ஆதரிக்க, தளத்தை ERC-721 மற்றும் ERC-1155 ஸ்டாண்டர்ட்களுக்கு இணங்கச் செய்தால் போதும்.

டோக்கன் ஸ்டாண்டர்ட்கள், ஃபன்ஜிபிலிட்டி, செயல்பாடுகள் ஆகியவற்றைப் புரிந்துகொண்ட பிறகு, Ethereum-இல் உள்ள மூன்று முதன்மை ஸ்டாண்டர்ட்களின் பயன்பாடுகளைப் பார்ப்போம்.

ERC-20: ஃபன்ஜிபிள் டோக்கன்கள்

ERC-20 என்பது ஃபன்ஜிபிள் டோக்கன் ஒப்பந்தங்களை உருவாக்குவதற்கான விதிகளை வரையறுக்கும் ஒரு டோக்கன் ஸ்டாண்டர்ட்.

ERC-20 டோக்கன்கள் ஒரு மீம்காயின் முதல் பரவலாக்கப்பட்ட சந்தையில் பணம் செலுத்தும் முறை வரை எதுவாகவும் இருக்கலாம். பெரும்பாலான சமயங்களில், இவை இந்த நான்கு பிரிவுகளில் ஒன்றில் அடங்கும்:

1. யூட்டிலிட்டி டோக்கன்: ஒரு ஆப் அல்லது தளச் சூழலுக்குள் குறிப்பிட்ட பயன்பாட்டைச் செய்கிறது.

எடுத்துக்காட்டு: சந்தை விலைகள் போன்ற நிஜ உலகத் தரவை ஸ்மார்ட் ஒப்பந்தங்களுக்கு வழங்கும் ஆபரேட்டர்களுக்குப் பணம் தர Chainlink (LINK) பயன்படுகிறது.

2. கவர்னன்ஸ் டோக்கன்: ஒரு தளத்தின் கவர்னன்ஸ் முடிவுகளில் வைத்திருப்பவர்களுக்கு வாக்குரிமை தருகிறது.

எடுத்துக்காட்டு: டொமைன் பதிவேட்டு நெறிமுறையை மேம்படுத்தும் முன்மொழிவுகளில் Ethereum Name Service (ENS) வைத்திருப்பவர்கள் வாக்களிக்கலாம்.

3. ஸ்டேபிள்காயின்: நிலையான மதிப்பைத் தக்கவைக்க வடிவமைக்கப்பட்டது, பொதுவாக அமெரிக்க டாலருக்குச் சமமாக.

எடுத்துக்காட்டுகள்: Tether (USDT), USD Coin (USDC), மற்றும் Sky-இன் USDS போன்ற புதியவை.

4. செக்யூரிட்டி டோக்கன்: நிறுவனப் பங்குகள் போன்ற அடிப்படைச் சொத்தில் உள்ள உரிமையைக் குறிக்கிறது.

எடுத்துக்காட்டு: டோக்கனாக்கப்பட்ட முதலீட்டு நிதிகள், அதாவது பெரிய சொத்து மேலாளர்கள் 2024-இல் ஆன்செயின் வெளியிடத் தொடங்கிய பணச்சந்தை நிதிகள் போன்றவை.

ஒரே டோக்கன் ஒன்றுக்கும் மேற்பட்ட பிரிவில் அடங்கலாம். எடுத்துக்காட்டாக, ஒரு கவர்னன்ஸ் டோக்கனுக்கு ஒரு தளத்துக்குள் குறிப்பிட்ட பயனும் இருக்கலாம்.

Uniswap போன்ற DEX-இல் ERC-20 டோக்கன்களை அல்லது Binance, Coinbase போன்ற மையப்படுத்தப்பட்ட எக்ஸ்சேஞ்ச் மூலம் எளிதாக வாங்கலாம்.

ERC-721: நான்-ஃபன்ஜிபிள் டோக்கன்கள்

ERC-721 என்பது நான்-ஃபன்ஜிபிள் டோக்கன்களை உருவாக்கவோ பயன்படுத்தவோ Ethereum பயனர்களுக்கான விதிகளை வரையறுக்கும் ஸ்டாண்டர்ட். உருவாக்கப்படும் ஒவ்வொரு NFT-ம் நிரூபிக்கக்கூடிய வகையில் தனித்துவமானது என்பதை இது உறுதி செய்கிறது.

ERC-721 டோக்கன்களின் சில பயன்பாடுகள் என்ன?

1. சொத்துகளின் உரிமை: தனித்துவமான டிஜிட்டல், நிஜ உலகச் சொத்துகளின் உரிமையைக் குறிக்க ERC-721 டோக்கன்கள் பரவலாகப் பயன்படுகின்றன. எடுத்துக்காட்டாக, இந்த எக்ஸ்ப்ளோரர் கையேட்டு என்ட்ரிக்கு தனித்தனியாக எண்ணிடப்பட்ட 100 பதிப்புகள் உள்ளன (படிப்பதற்கு மட்டுமல்ல, சொந்தமாக்கிக்கொள்வதற்கும்), உங்கள் டிஜிட்டல் புத்தக அலமாரியில் ஒரு புத்தகம் போல. (மேலே உள்ள தங்க நிற ‘Collect Entry’ பொத்தானை அழுத்தி இதை மிண்ட் செய்து சொந்தமாக்கிக்கொள்ளலாம்.) Bankless Academy-இன் ‘Datadisk Collectibles’-ம் இதே முறையில் இயங்குகின்றன.

2. சந்தாக்களும் உறுப்பினர் அட்டைகளும்: படைப்பாளர்கள், கலைஞர்கள், கிளப்புகள், நிறுவனங்கள் ஏற்கெனவே சந்தாக்கள், நிகழ்ச்சி டிக்கெட்டுகள், உறுப்பினர் அட்டைகளுக்கு NFT-களைப் பயன்படுத்துகிறார்கள். NFT-களின் நிரூபிக்கக்கூடிய தனித்துவம், நிலையான வழங்கலில் ஒவ்வொன்றும் ஒரு தனிப் பயனருடன் இணைந்திருப்பதை உறுதி செய்கிறது.

3. விசுவாச வெகுமதிகள்: Starbucks நிறுவனம் 2024 மார்ச் வரை Odyssey என்ற விசுவாசத் திட்டத்தை நடத்தியது; அதில் உறுப்பினர்கள் குவெஸ்ட்டுகளை முடித்து NFT-களைப் பெற்று, அவற்றை டிஜிட்டல், நிஜ உலக வெகுமதிகளாக மாற்றிக்கொள்ள முடிந்தது. பயனர்கள் விரும்பும்போது மாற்றிக்கொள்ளவோ விற்கவோ கூடிய விசுவாச வெகுமதியாகப் பல பிற பிராண்டுகளும் NFT-களைத் தருகின்றன.

4. அடையாளமும் சான்றிதழ்களும்: திருத்த முடியாத அடையாளங்களையும் சான்றிதழ்களையும் உருவாக்க ERC-721 டோக்கன்கள் பயன்படும். உங்கள் டிஜிட்டல் அடையாளமோ சான்றிதழ்களோ ERC-721 டோக்கன்களாக இருக்கும்போது, உங்கள் உரிமையை நிரூபிப்பது எளிது; உங்கள் ஆவணங்களைப் போலியாக உருவாக்கித் தவறாகப் பயன்படுத்துவது கிட்டத்தட்ட இயலாதது.

ஓர் ERC-721 டோக்கனைப் பெற, OpenSea போன்ற ஓர் NFT சந்தையில் அக்கவுண்ட் உருவாக்கி, பட்டியலிடப்பட்ட எந்த NFT-யையும் வாங்குங்கள். சந்தை மோசடிகளிலிருந்து உங்களைப் பாதுகாத்துக்கொள்ள எங்கள் Web3 பாதுகாப்பு பாடத்தைக் கட்டாயம் படியுங்கள்.

ERC-1155: ஃபன்ஜிபிள், நான்-ஃபன்ஜிபிள் டோக்கன்கள்

பெரும்பாலும் மல்டி-டோக்கன் ஸ்டாண்டர்ட் என்று அழைக்கப்படும் ERC-1155, ERC-20 மற்றும் ERC-721 கருத்துகளை ஒன்றிணைக்கிறது; ஃபன்ஜிபிள், நான்-ஃபன்ஜிபிள் டோக்கன்கள் இரண்டையும் ஆதரிக்கும் ஒப்பந்தங்களை உருவாக்குநர்கள் எழுத வழி செய்கிறது. இது பயனர் அனுபவத்தில் பெரிய வேறுபாட்டை ஏற்படுத்தாது, ஆனால் தள அம்சங்களை மேம்படுத்த உதவும். ஒரே ஒப்பந்தத்தின் கீழ் ஃபன்ஜிபிள் கேம் நாணயத்தையும் நான்-ஃபன்ஜிபிள் கேம் சொத்துகளையும் வெளியிடுவது இதற்கு எடுத்துக்காட்டு.

செமி-ஃபன்ஜிபிள் டோக்கன்களை உருவாக்கவும் இந்த ஸ்டாண்டர்ட் வழி செய்கிறது: குறிப்பிட்ட சூழல்களில் ஃபன்ஜிபிள் ஆகவும் நான்-ஃபன்ஜிபிள் ஆகவும் இருக்கும் டோக்கன்கள். எடுத்துக்காட்டாக, ஒரு டிரேடிங் கார்டு சேகரிப்பில், ஒரே அரிதான தன்மை கொண்ட அனைத்துக் கார்டுகளும் ஃபன்ஜிபிள் (ஒன்றுக்கொன்று பதிலாகக்கூடியவை) ஆக இருக்கலாம்; வெவ்வேறு அரிதான நிலைகள் கொண்ட கார்டுகள் நான்-ஃபன்ஜிபிள் ஆக இருக்கலாம்.

பல டோக்கன் வகைகளை ஒரே நேரத்தில் அனுப்பப் பேட்ச் பரிவர்த்தனைகளையும் ERC-1155 சாத்தியமாக்குகிறது; இதனால் பயனர்களுக்கு கேஸ் செலவு குறையலாம்.

எக்ஸ்ப்ளோரர் கையேட்டின் இந்த நீளமான என்ட்ரியை, ‘டோக்கன் ஸ்டாண்டர்ட்களைப் புரிதல்’, முழுவதும் படித்ததற்குப் பாராட்டுகள்.

பயணத்தில் எளிதாகப் பார்த்துக்கொள்ள ஒரு நகலை வைத்திருக்க விரும்பினால், அல்லது Bankless Academy-இன் எதிர்கால உள்ளடக்கத்துக்கு ஆதரவு தர விரும்பினால், இந்த என்ட்ரியைச் சேகரிக்க மறவாதீர்கள். பயணம் இனிதாகட்டும், எக்ஸ்ப்ளோரர்!

Ethereum டோக்கன் ஸ்டாண்டர்ட் பொதுவான கேள்விகள்

Ethereum டோக்கன் ஸ்டாண்டர்ட்கள் எப்படி உருவாக்கப்படுகின்றன?

Ethereum Improvement Proposals (EIPs) என்ற முன்மொழிவு நடைமுறை மூலம் டோக்கன் ஸ்டாண்டர்ட்கள் Ethereum-இல் முன்மொழியப்பட்டு வெளியிடப்படுகின்றன. வாக்கெடுப்பு எதுவும் இல்லை: முன்மொழிவு பொது விவாதத்தில் செம்மைப்படுத்தப்படுகிறது; அது செயல்படும் என்று சமூகம் பரவலாக ஒப்புக்கொண்டதும், Ethereum Request for Comment (ERC) என்ற ஸ்டாண்டர்டாக ஆசிரியர்கள் அதை இறுதிப்படுத்துகிறார்கள். பிறகு EIP-இன் வரிசை எண் சேர்க்கப்பட்டு ஸ்டாண்டர்டின் பெயர் முழுமையாகிறது, எ.கா. ERC-20 அல்லது ERC-721.

ஈதர் (ETH) ஏதேனும் டோக்கன் ஸ்டாண்டர்டைப் பின்பற்றுகிறதா?

இல்லை. உண்மையில் ETH ஒரு ‘டோக்கன்’ அல்ல, ‘காயின்’ என்றே அழைக்கப்படுகிறது; அதாவது அதற்குச் சொந்த பிளாக்செயின் உண்டு.

யார் வேண்டுமானாலும் ஒரு டோக்கனை வெளியிட முடியுமா?

ஆம். Ethereum என்பது அனுமதி தேவையில்லாத சூழல்; யார் வேண்டுமானாலும் ஃபன்ஜிபிள் அல்லது நான்-ஃபன்ஜிபிள் டோக்கனை வெளியிடலாம். ஆனால் தொழில்நுட்ப அறிவோ, கோட் இல்லாத கருவிகளுக்கான அணுகலோ தேவைப்படும்.

இரண்டு டோக்கன்களுக்கு ஒரே பெயர் இருந்தால், அதிகாரப்பூர்வமானது எது என்று எப்படி அறிவது?

அசல் டோக்கனைக் கண்டறிய, நீங்கள் பயன்படுத்த விரும்பும் டோக்கன்களை வெளியிடப் பயன்படுத்தப்பட்ட ஒப்பந்த முகவரியைச் சரிபார்த்து, அதை அதிகாரப்பூர்வத் திட்ட ஆவணங்களுடன் ஒப்பிடுங்கள். இப்படிச் செய்தால், உங்கள் வாலெட்டைக் காலி செய்யக்கூடிய தீங்கான டோக்கன் ஒப்பந்தத்துடன் தொடர்பு கொள்ளாமல் இருப்பீர்கள்.

ERC-20, 721, 1155 தவிர Ethereum-இல் வேறு டோக்கன் ஸ்டாண்டர்ட்கள் உள்ளனவா?

ஆம். சில பரவலாகப் பயன்படுகின்றன, எடுத்துக்காட்டாக ERC-4626; DeFi-இல் ஈல்ட் ஈட்டும் வைப்புகளைக் குறிக்கும் பெட்டகம் டோக்கன்களுக்கான பொதுவான ஸ்டாண்டர்ட் இது. புதிய ஸ்டாண்டர்ட்கள் ஸ்மார்ட் அக்கவுண்டுகள் பற்றியும் பேசுகின்றன; ஒரு வாலெட் தன் சொந்தக் கோட்டை இயக்க இவை வழி செய்கின்றன. ERC-223, ERC-1462, ERC-1948 போன்ற சில ஒருபோதும் பரவலாகவில்லை, அல்லது மிகக் குறுகிய பயன்பாடுகளுக்கே உதவுகின்றன.

எழுதியவர்கள்

Musharraf Unhashed-இன் இணை நிறுவனர். Web3 திட்டங்களுக்கு உள்ளடக்க உத்தி வகுத்து அதைச் செயல்படுத்த உதவுகிறார்.

Tetranome Bankless Academy-இன் Project Champion. பயனர் அனுபவம், இடைமுகம், வடிவமைப்பு, உள்ளடக்கம் ஆகியவற்றில் கவனம் செலுத்துகிறார்.

பதிப்பாசிரியர்கள்

Trewkat BanklessDAO-இல் எழுத்து, திருத்தப் பணிகளைச் செய்கிறார். கிரிப்டோ, NFT பற்றி அறிவதில் ஆர்வம் கொண்டவர்; குறிப்பாக இந்த அறிவைப் பிறருக்கு எப்படிச் சிறப்பாகக் கடத்துவது என்பதில்.

ஆதரவாளர்

இந்தக் கட்டுரைக்கு எந்த ஸ்பான்சரும் இல்லை; இது உங்கள் இலவச Bankless Academy கல்வியின் ஒரு பகுதி. எதிர்கால உள்ளடக்கத்துக்கு ஆதரவு தர இந்தக் கட்டுரையைச் சேகரியுங்கள்!