तुमचे Web3 यूजरनेम नोंदवणे

ENS वापरून वॉलेटच्या पत्त्याला स्वतःचे नाव द्या आणि डिजिटल ओळख घडवायला सुरुवात करा.

महत्त्वाचे मुद्दे

Ethereum Name Service (ENS) वापरून तुम्ही एकच यूजरनेम तयार करू शकता, जे अनेक ब्लॉकचेनवर तुमचे प्रतिनिधित्व करते.

ENS नावांमुळे लांबलचक वॉलेट पत्त्याऐवजी web3explorer.eth सारखे लक्षात राहणारे नाव वापरता येते, त्यामुळे क्रिप्टोकरन्सी पाठवणे व स्वीकारणे सोपे होते

तुमची ENS नावे तुमच्या ऑनलाइन अस्तित्वाशी जोडली जातात: क्रिप्टोकरन्सी पोर्टफोलिओ, ब्लॉकचेनवरील व्यवहार, सोशल मीडिया पेज, अवतार, वेबसाइट आणि ईमेल, या सगळ्यांची मिळून एकच ऑनचेन ओळख तयार होते.

ENS नाव नोंदवणे .com वेबसाइट पत्ता नोंदवण्यासारखेच आहे. त्यासाठी एक क्रिप्टोकरन्सी वॉलेट आणि 10 मिनिटे लागतात.

सर्वत्र चालणारे यूजरनेम

संपूर्ण इंटरनेटसाठी एकच यूजरनेम असेल तर? तुमच्या पूर्ण ऑनलाइन अस्तित्वासाठी एकच खाते, ज्याची मालकी तुमची असेल आणि जे इंटरनेटवरील इतर ॲप्सना जोडता येईल. हे यूजरनेम तुमचे डिजिटल व्यक्तिमत्त्व बनेल, संपूर्ण इंटरनेटवर तुमची ओळख पटवेल आणि ऑनलाइन समुदायात तुम्हाला एक वेगळे, लक्षात राहणारे स्थान देईल.

Ethereum Name Service (ENS) सारखे प्रकल्प क्रिप्टोकरन्सी वॉलेटच्या ताकदीवर हीच एक-यूजरनेम कल्पना प्रत्यक्षात आणत आहेत. ENS वापरून तुमच्या नॉन-कस्टोडियल वॉलेटचा पत्ता तुमच्या पसंतीच्या नावात बदलतो, ज्याला .eth जोडलेले असते.

0xB00e26E79352882391604E24b371A3F3c8658e8c → web3explorer.eth

.com वेबसाइट पत्त्याप्रमाणेच ते वाचायला सोपे, लक्षात राहणारे आणि तुमच्यासाठी खास असते. इंटरनेटवर कुठेही असाल, तरी तुमचे नाव तेच आणि ओळखीचे राहील. तुमच्या वॉलेटवर क्रिप्टोकरन्सी पाठवण्यासाठी आता लांबलचक पत्ता जपून ठेवावा किंवा कॉपी-पेस्ट करावा लागत नाही. Base वरील Basenames सारख्या तशाच नावप्रणाली इतर नेटवर्कवरही आहेत, पण ENS-ची .eth नावे आजही सर्वाधिक वापरली जाणारी पद्धत आहे.

आणि ही तर फक्त सुरुवात आहे.

सुरुवातीला आम्ही ENS-कडे क्रिप्टो पत्त्यांना नाव देणारी प्रणाली म्हणून पाहत होतो.. (पण) web3 वापरकर्त्यांसाठी पत्त्याचा अर्थ याहून खूप मोठा आहे: तो तुमचा Farcaster id असू शकतो, तुमचा क्रिप्टो पेमेंट पत्ता असू शकतो, एखादा DAO कॉन्ट्रॅक्ट असू शकतो आणि बरेच काही.

web3-चे उपयोग वाढत आहेत, आणि पुढच्या अब्जावधी लोकांना web3-मध्ये आणायचे असेल तर ते वापरण्यायोग्य असले पाहिजे. या सगळ्या गोष्टींना नीट नावे मिळाली की web3 वापरण्यायोग्य होते, ते माणसाळते.

ENS web3-ला माणसाळवते.

- Jefflau.eth, ENS Labs मधील कोअर डेव्हलपर

तुमचा वॉलेट पत्ता एका खास .eth यूजरनेमशी जोडून तुम्ही खरे तर नॉन-कस्टोडियल वॉलेटच्या मालकी-शक्तीसह एक web3 व्यक्तिमत्त्व तयार करता. ENS नावे अनेक नेटवर्कवरील वॉलेटना आधार देऊ शकतात. एकच सर्वत्र चालणारे नाव आता वेगवेगळ्या ब्लॉकचेनवरील तुमची डिजिटल मालमत्ता, तुमचा ब्लॉकचेन इतिहास आणि बरेच काही यांच्याशी जोडले जाते. यात तुम्ही मिळवलेली खास प्रमाणपत्रेही येतात, जसे तुमचे Bankless Academy बॅज.

ऑनचेन ओळख

ENS-ची क्षमता फक्त वॉलेट पत्त्यांना नाव देण्यापुरती नाही; ENS ब्लॉकचेनवरील जवळपास कोणत्याही गोष्टीला किंवा ॲसेटला नाव देऊ शकते, उदाहरणार्थ स्मार्ट कॉन्ट्रॅक्ट, आणि Web2 इंटरनेटवरील कोणत्याही ठिकाणाकडे निर्देश करू शकते. तुमची वेबसाइट, सोशल मीडिया प्रोफाइल आणि ईमेल, हे सगळे या एकाच यूजरनेमशी जोडता येते.

ENS-कडे तुमचा ऑनचेन पासपोर्ट म्हणून पाहा. प्रत्यक्ष पासपोर्टवर तुमचे नाव, फोटो, जन्मतारीख आणि पासपोर्ट क्रमांक असतो, आणि तो सरकारच्या ओळख डेटाबेसमधील मोठ्या माहितीशी जोडलेला असतो. ENS तुमचे .eth डोमेन (yourname.eth) एका Ethereum पत्त्याशी, प्रोफाइल फोटोशी, ट्रेड व गव्हर्नन्स मतांसारख्या ऑनचेन डेटाशी आणि वेबसाइटसारख्या ऑफचेन डेटाशी जोडते.

महत्त्वाचा फरक हा: या ऑनचेन पासपोर्टच्या प्रत्येक भागाची मालकी आणि नियंत्रण तुमच्याकडे असते.

ENS नावे Ethereum ब्लॉकचेनवर NFT टोकन (ERC-721 टोकन) म्हणून असतात. क्रिप्टोकरन्सीप्रमाणेच त्यांची मालकी तुमच्याकडे असते आणि ती तुमच्या नॉन-कस्टोडियल वॉलेटमधून सांभाळली जातात. web3-मध्ये तुम्ही तुमच्या ऑनलाइन ओळखीचे खरे मालक होता आणि ती इंटरनेटवर सोबत घेऊन फिरता. तुमचे खाते (त्यातील डेटा, मजकूर, फॉलोअर वगैरे) तुम्ही वापरत असलेली व्यासपीठे पुसून टाकू शकत नाहीत. YouTube, Instagram आणि इंटरनेट समुदाय चालवणाऱ्या इतर web2 दिग्गजांच्या नियंत्रणापलीकडे जाण्याची वाटचाल सुरू आहे.

ENS नावे ऑनचेन ॲप्सशी कशी जोडली जातात ते पाहूया, सुरुवात Bankless Academy-च्या ‘Explorer Profile’ सुविधेपासून. ENS नाव असलेल्या Bankless Academy वापरकर्त्याला तुमच्या प्रोफाइलवर आपोआप ENS नाव आणि प्रोफाइल फोटो दिसतो. ही माहिती धड्यांचे बॅज आणि जमवलेला मजकूर यांसारख्या तुमच्या Academy कामगिरीसोबत दाखवली जाते.

दुसरे उदाहरण म्हणजे Farcaster, एक विकेंद्रित सोशल नेटवर्क. इतर अनेक web3 ॲप्सप्रमाणे ते तुम्हाला वॉलेट जोडू देते आणि ओळख शून्यापासून सुरू करण्याऐवजी तुमचे ENS नाव व प्रोफाइल फोटो दाखवते. एकच ऑनचेन ओळख ॲप्सदरम्यान तुमच्यासोबत फिरते.

मजेदार माहिती: 2017 मध्ये सुरू झाल्यापासून ENS-वर लाखो .eth नावे नोंदवली गेली आहेत. 🐂

आता ऑनचेन नागरिक होण्याची आणि विकेंद्रित भविष्य घडवण्याची वेळ आली आहे. ENS नाव नोंदवण्याची वेळ आली आहे. ही प्रक्रिया टप्प्याटप्प्याने दाखवली जाईल, आणि Bankless Academy सारख्या अनेक ऑनचेन ॲप्समध्ये दिसणारा प्रोफाइल फोटो नेमण्यासह तिची मुख्य वैशिष्ट्ये वापरायला मदत होईल.

ही प्रक्रिया GoDaddy किंवा Namecheap सारख्या व्यासपीठावर .com वेबसाइट पत्ता नोंदवण्यासारखीच आहे. एक खास नाव निवडायचे आणि दोन ब्लॉकचेन व्यवहार पाठवायचे, इतकेच.

पूर्वतयारी

1. क्रिप्टो वॉलेट तयार करा

ENS नाव विकत घेण्यासाठी आणि सांभाळण्यासाठी वॉलेट लागते. अजून तयार केले नसेल, तर आमचे छोटे मार्गदर्शन ‘क्रिप्टो वॉलेट तयार करणे’ पाहा आणि 5 मिनिटांत वॉलेट तयार करा.

2. Ethereum मेननेटवर तुमच्या वॉलेटमध्ये ETH असल्याची खात्री करा

केंद्रित एक्सचेंजवरून क्रिप्टोकरन्सी पाठवून, किंवा MoonPay व Transak सारख्या सेवा वापरून वॉलेटमध्ये पैसे भरता येतात. नोंदणी शुल्क ETH मध्ये भरले जाते.

टप्प्याटप्प्याने

1. ENS Manager App उघडा आणि तुमचे वॉलेट जोडा.

2. हवे असलेले नाव शोधा आणि निवडा.

3. नोंदणीचा कालावधी निवडा.

तुमचे ENS नाव वेळोवेळी नूतनीकरण करावे लागते. मुदत संपण्यापूर्वी आठवण करून देणारी नोंद तुमच्या कॅलेंडरमध्ये नक्की ठेवा.

4. पेमेंटचे तपशील तपासा.

नोंदणी शुल्क आणि गॅस तुमच्या वॉलेटमधील ETH शिल्लकीतून भरले जातात.

ऐच्छिक: याच टप्प्यावर तुमचे डोमेन प्राइमरी नेम म्हणून नेमा. म्हणजे Bankless Academy, Farcaster आणि ENS-ला आधार देणाऱ्या इतर व्यासपीठांवर लांबलचक वॉलेट पत्त्याऐवजी तुमचे ENS नाव व प्रोफाइल फोटो दिसेल.

5. पुढील नोंदणी टप्पे वाचून घ्या.

6. पहिल्या व्यवहारावर स्वाक्षरी करून 60 सेकंदांचा टाइमर सुरू करा.

हा पहिला व्यवहार इतरांना तुमच्या नोंदणी प्रक्रियेत फ्रंट-रनिंग करण्यापासून रोखतो.

7. टाइमर संपण्याची वाट पाहा.

8. दुसऱ्या व्यवहारावर स्वाक्षरी करा.

याच व्यवहारामुळे तुमच्या नव्या ENS नावाची मालकी निश्चित होते आणि ते तुमच्या वॉलेटमध्ये येते.

9. यशस्वी!

तुमचे ENS नाव आता तुमच्या वॉलेटमध्ये ERC-721 टोकन म्हणून दिसेल.

तुमचे ENS नाव तुमच्या वॉलेट पत्त्याकडे नेते का, हे https://etherscan.io/ वर जाऊन पत्ता शोध पट्टीत ENS नाव टाकून तपासता येते; याला काही मिनिटे लागू शकतात. एकदा हे चालू लागले की तुमचे ENS नाव मित्रांना सांगण्यासाठी आणि Ethereum ॲप्सशी जोडण्यासाठी तयार आहे.

नव्या ENS नावाच्या आणखी उपयोगांसाठी खालचा ‘वारंवार विचारले जाणारे प्रश्न’ विभाग नक्की पाहा!

समारोप

तुमचे web3 यूजरनेम नोंदवून तुम्ही विकेंद्रित वेबवर स्वतःवरचा पूर्ण अधिकार स्वीकारता आणि अशा भविष्याकडे जाता जिथे तुमच्या ऑनचेन ओळखीचे मालक फक्त तुम्हीच असता. ENS हे तुमचे web3 यूजरनेम आणि वॉलेट पत्ता, दोन्ही म्हणून काम करते आणि डिजिटल जगात तुमची उपस्थिती नोंदवते. ते ऑनचेन ॲप्सशी सहज जुळते आणि प्रत्येक व्यवहारातून तुमची ओळख दाखवते व घडवते.

एकदा तयार झाल्यावर तुमची ऑनचेन ओळख पूर्णपणे तुमच्याच ताब्यात असते, आणि तिचे नूतनीकरण करणे ही तुमची जबाबदारी असते. सत्तेच्या गैरवापरापासून मुक्त, वापरकर्त्यांना बळ देणारे इंटरनेट घडवण्यात ENS-चा स्वीकार महत्त्वाचा आहे. ENS-सोबत विकेंद्रित वेबवरील प्रत्येक कृती तुमच्या खास ऑनचेन व्यक्तिमत्त्वाची साक्ष ठरते.

ENS-सोबत तुमच्या ऑनचेन ओळखीचा ताबा घेण्याची वेळ आली आहे. एक्सप्लोररच्या हँडबुकमधील ‘तुमचे Web3 यूजरनेम नोंदवणे’ ही नोंद तुम्हाला आवडली असेल अशी आशा आहे.

प्रवासात सहज पाहता यावी म्हणून स्वतःची एक प्रत हवी असेल, किंवा Bankless Academy-वरील पुढच्या मजकुराला पाठिंबा द्यायचा असेल, तर ही नोंद जमवायला विसरू नका. प्रवास सुखाचा होवो, एक्सप्लोरर!

वारंवार विचारले जाणारे प्रश्न

प्राइमरी नेम म्हणजे काय?

तुमचे प्राइमरी नेम हे तुमच्या ऑनचेन वॉलेट पत्त्याचे टोपणनाव म्हणून काम करते आणि क्लिष्ट Ethereum पत्ता सोपा करते. प्राइमरी नेम नेमल्यावर वेगवेगळी ॲप्स ते नाव आणि तुमचा प्रोफाइल फोटो वापरून दाखवू शकतात. अधिक माहिती इथे!

माझा ईमेल, वेबसाइट किंवा सोशल मीडिया ENS नावाशी जोडता येईल का?

हो, नक्कीच! पासपोर्टवर तुमचे वेगवेगळे तपशील असतात, तसेच तुमचे ENS नाव विविध वैयक्तिक माहितीशी जोडता येते. यात ईमेल, वैयक्तिक वेबसाइट, प्रोफाइल फोटो आणि सोशल मीडिया हँडल येतात.

या स्टँडर्ड रेकॉर्ड्समुळे तुमची संपर्क माहिती विकेंद्रित पद्धतीने सार्वजनिकपणे सामायिक करता येते. ती ऑनचेन साठवली जाते आणि ENS नावे ओळखणाऱ्या कोणत्याही ॲपमधून वापरता येते.

तुमच्या ENS नावासाठी रेकॉर्ड कसे नेमायचे आणि प्रत्येक प्रकारचा रेकॉर्ड कशासाठी वापरता येतो, याच्या नवशिक्यांसाठीच्या मार्गदर्शनासाठी हा लेख पाहा.

ENS नाव नोंदवायला किती खर्च येतो?

सध्या ENS नावांच्या नोंदणीचे दर असे आहेत:

5 किंवा अधिक अक्षरांची नावे: दरवर्षी $5 ETH मध्ये.
4 अक्षरांची नावे: दरवर्षी $160 ETH मध्ये.
3 अक्षरांची नावे: दरवर्षी $640 ETH मध्ये.

यात Ethereum नेटवर्कवरील व्यवहाराचे गॅस शुल्क समाविष्ट नाही; त्याचा अंदाज ENS Manager App मध्ये मिळतो. कस्टम रेकॉर्ड्स नेमण्यासारख्या ऑनचेन बदलांसाठी वेगळे गॅस शुल्क लागते. लहान नावे दुर्मिळ असल्याने त्यांचे दर जास्त असतात. शुल्कामुळे सट्टेबाज नोंदणी आवरली जाते आणि ENS-च्या विकासासाठी DAO-ला निधी मिळतो.

अनेक वॉलेट पत्ते एकाच ENS नावाशी जोडता येतील का?

नक्कीच! तुमचे ENS नाव अनेक वॉलेट पत्ते एकाच नावाशी, म्हणजे 'yourname.eth' शी जोडू शकते, किंवा प्रत्येक पत्त्याशी संबंधित क्रिप्टोकरन्सी ओळखता यावी म्हणून पत्ते वेगवेगळ्या सबनेममध्ये विभागता येतात, जसे 'ethereum.yourname.eth' किंवा 'bitcoin.yourname.eth'.

यापैकी कोणताही पर्याय ENS Manager App मधून वापरता येतो. अधिक तपशिलांसाठी टप्प्याटप्प्याने सूचना देणारे हे मार्गदर्शन पाहा

माझा सध्याचा वेबसाइट पत्ता ENS नाव म्हणून वापरता येईल का?

हो. web3explorer.com सारखी वेबसाइट तुमच्या मालकीची असेल, तर web3explorer.eth ऐवजी तीच वापरता येते. ENS आणि GoDaddy यांनी मिळून उभारलेल्या यंत्रणेमुळे हे शक्य झाले आहे.

अधिक जाणून घेण्यासाठी ENS Labs-ची ब्लॉग पोस्ट पाहा.

लेखन

Marcus ENS DAO Newsletter प्रकाशित करतात. प्रोटोकॉल शुल्कातून मिळणारा अतिरिक्त महसूल ॲप्लिकेशन स्तरावरील विकासाला आणि इतर ओपन सोर्स यंत्रणेला कसा हातभार लावू शकतो, यावर ते संशोधन करतात.

Tetranome Bankless Academy-मध्ये Content & Design Lead आहेत आणि शिकण्याचा प्रवास, यूजर इंटरफेस व अनुभव, तसेच व्यासपीठाची कलाकृती यावर काम करतात.

पाठबळ

हे मार्गदर्शन Bankless Academy-ने उपलब्ध करून दिले आहे.