మీ Web3 యూజర్‌నేమ్ నమోదు చేయడం

ముఖ్యాంశాలు

• Ethereum Name Service (ENS) వాడి, పలు బ్లాక్‌చైన్‌లలో మిమ్మల్ని సూచించే ఒకే యూజర్‌నేమ్ సృష్టించుకోవచ్చు.

• మీ పొడవాటి వాలెట్ చిరునామా స్థానంలో web3explorer.eth లాంటి గుర్తుండే పేరు పెట్టి, క్రిప్టోకరెన్సీ పంపడం, అందుకోవడం ENS పేర్లు సులభం చేస్తాయి

• మీ ENS పేర్లు మీ ఆన్‌లైన్ ఉనికితో ముడిపడతాయి: మీ క్రిప్టోకరెన్సీ పోర్ట్‌ఫోలియో, బ్లాక్‌చైన్ వ్యవహారాలు, సోషల్ మీడియా పేజీలు, అవతార్‌లు, వెబ్‌సైట్‌లు, ఈమెయిల్‌లు అన్నీ కలిసి ఒకే ఆన్‌చైన్ గుర్తింపు అవుతాయి.

• ENS పేరు నమోదు చేయడం .com వెబ్‌సైట్ చిరునామా నమోదు చేయడం లాంటిదే. దీనికి ఒక క్రిప్టోకరెన్సీ వాలెట్, 10 నిమిషాలు చాలు.

సార్వత్రిక యూజర్‌నేమ్‌ల పరిచయం

ఇంటర్నెట్ మొత్తానికీ ఒకే యూజర్‌నేమ్ ఉందని ఊహించుకోండి. మీ ఆన్‌లైన్ ఉనికి అంతటికీ ఒకే ఖాతా: అది మీ సొంతం, ఇంటర్నెట్‌లోని ఇతర యాప్‌లకు దాన్ని కలపవచ్చు. ఈ యూజర్‌నేమ్ మీ డిజిటల్ వ్యక్తిత్వంగా పనిచేస్తుంది, ఇంటర్నెట్ అంతటా మిమ్మల్ని గుర్తుపట్టేలా చేస్తుంది, ఆన్‌లైన్ సముదాయంలో మిమ్మల్ని ప్రత్యేకంగా, గుర్తుండేలా నిలబెడుతుంది.

క్రిప్టోకరెన్సీ వాలెట్‌ల శక్తిని వాడుకుని Ethereum Name Service (ENS) లాంటి ప్రాజెక్ట్‌లు ఈ ఒకే యూజర్‌నేమ్ కలను నిజం చేస్తున్నాయి. ENS-తో మీ నాన్-కస్టోడియల్ వాలెట్ చిరునామాను, .eth పొడిగింపుతో మీకు నచ్చిన సొంత చిరునామాగా మార్చుకోవచ్చు.

0xB00e26E79352882391604E24b371A3F3c8658e8c → web3explorer.eth

.com వెబ్‌సైట్ చిరునామా లాగే ఇది చదవడానికి సులభం, గుర్తుండేది, మీకే సొంతం. ఇంటర్నెట్‌లో మీరు ఎక్కడ ఉన్నా మీ పేరు ఒకేలా, గుర్తుపట్టేలా ఉంటుంది. మీ వాలెట్‌కు క్రిప్టోకరెన్సీ పంపడానికి ఇక పొడవాటి చిరునామాను సేవ్ చేసి, కాపీ చేసి, పేస్ట్ చేయాల్సిన అవసరం లేదు. Base-లోని Basenames లాగా ఇతర నెట్‌వర్క్‌లలోనూ ఇలాంటి నామకరణ వ్యవస్థలు ఉన్నాయి, కానీ అత్యధికంగా వాడే ప్రమాణం ఇప్పటికీ ENS .eth పేర్లే.

ఇది కేవలం ఆరంభం మాత్రమే.

మొదట్లో క్రిప్టో చిరునామాలకు పేరు పెట్టే వ్యవస్థగానే ENS-ను ఊహించాం.. (కానీ) Web3 వినియోగదారులకు ఒక చిరునామా అర్థం అంతకంటే చాలా ఎక్కువ. అది మీ Farcaster id కావచ్చు, మీ క్రిప్టో చెల్లింపు చిరునామా కావచ్చు, ఒక DAO కాంట్రాక్ట్ కావచ్చు, ఇంకా ఎన్నో.

Web3 వినియోగ సందర్భాలు పెరుగుతున్నాయి. తర్వాతి బిలియన్ మందిని Web3-లోకి తీసుకురావాలంటే అది వాడుకకు అనువుగా ఉండాలి. ఇవన్నీ సరిగ్గా పేరు పొందినప్పుడే Web3 వాడుకకు అనువుగా, మానవీయంగా మారుతుంది.

ENS Web3-ను మానవీయంగా మారుస్తుంది.

- Jefflau.eth, ENS Labs కోర్ డెవలపర్

మీ వాలెట్ చిరునామాను ఒక ప్రత్యేక .eth యూజర్‌నేమ్‌తో కలపడం ద్వారా, నాన్-కస్టోడియల్ వాలెట్ యాజమాన్య శక్తి ఉన్న Web3 వ్యక్తిత్వాన్ని మీరు సృష్టించారు. ENS పేర్లు పలు నెట్‌వర్క్‌లలోని వాలెట్‌లకు మద్దతివ్వగలవు. ఇప్పుడు ఒకే సార్వత్రిక పేరు, బ్లాక్‌చైన్‌లలోని మీ డిజిటల్ ఆస్తులతో, మీ బ్లాక్‌చైన్ చరిత్రతో, ఇంకా ఎన్నో వాటితో ముడిపడి ఉంది. మీ Bankless Academy బ్యాడ్జ్‌ల లాంటి ప్రత్యేక క్రెడెన్షియల్‌లు కూడా ఇందులో ఉంటాయి.

ఆన్‌చైన్ గుర్తింపు

ENS సామర్థ్యాలు వాలెట్ చిరునామాలకు పేరు పెట్టడంతో ఆగవు; స్మార్ట్ కాంట్రాక్ట్ లాంటి బ్లాక్‌చైన్‌లోని దాదాపు ఏ అంశానికైనా, ఆస్తికైనా ENS పేరు పెట్టగలదు, Web2 ఇంటర్నెట్‌లోని ఏ చోటునైనా చూపగలదు. మీ వెబ్‌సైట్, సోషల్ మీడియా ప్రొఫైల్‌లు, ఈమెయిల్ అన్నీ ఈ ఒకే యూజర్‌నేమ్‌తో ముడిపెట్టవచ్చు.

ENS-ను ఇలా ఊహించుకోండి: అది మీ ఆన్‌చైన్ పాస్‌పోర్ట్. భౌతిక పాస్‌పోర్ట్‌లో మీ పేరు, ఫోటో, పుట్టిన తేదీ, పాస్‌పోర్ట్ నంబర్ ఉంటాయి, అవి ప్రభుత్వ గుర్తింపు డేటాబేస్‌లోని విస్తృత సమాచారంతో కలుస్తాయి. ENS మీ .eth డొమైన్‌ను (yourname.eth) ఒక Ethereum చిరునామాతో, ప్రొఫైల్ చిత్రంతో, ట్రేడ్‌లు, గవర్నెన్స్ ఓట్ల లాంటి ఆన్‌చైన్ డేటాతో, మీ వెబ్‌సైట్ లాంటి ఆఫ్‌చైన్ డేటాతో అనుసంధానిస్తుంది.

ముఖ్యమైన తేడా ఇదే: ఈ ఆన్‌చైన్ పాస్‌పోర్ట్ అన్ని అంశాలూ మీ సొంతం, మీ నియంత్రణలోనే.

Ethereum బ్లాక్‌చైన్‌పై ENS పేర్లు NFT టోకెన్‌లుగా (ERC-721 టోకెన్‌లు) ఉంటాయి. క్రిప్టోకరెన్సీ లాగే అవి మీ నాన్-కస్టోడియల్ వాలెట్ సొంతం, దాని ద్వారానే వాటిని నిర్వహిస్తారు. Web3-లో మీ ఆన్‌లైన్ గుర్తింపు నిజంగా మీ సొంతం, దాన్ని ఇంటర్నెట్ అంతటా వెంట తీసుకెళ్లవచ్చు. మీ ఖాతాను (దాని డేటా, కంటెంట్, ఫాలోవర్‌లు మొదలైనవి) మీరు వాడే వేదికలు తుడిచేయలేవు. ఇంటర్నెట్ సముదాయాన్ని నడిపే YouTube, Instagram లాంటి Web2 దిగ్గజాల నియంత్రణను దాటి మనం ముందుకు వెళ్తున్నాం.

మన ENS పేర్లు ఆన్‌చైన్ యాప్‌లతో ఎలా కలుస్తాయో చూద్దాం, Bankless Academy ‘Explorer Profile’ ఫీచర్‌తో మొదలుపెడదాం. ENS పేరు ఉన్న Bankless Academy వినియోగదారు అయితే, మీ ప్రొఫైల్లో మీ ENS పేరు, ప్రొఫైల్ చిత్రం వాటంతట అవే కనిపిస్తాయి. పాఠ బ్యాడ్జ్‌లు, సేకరించిన కంటెంట్ లాంటి మీ Academy విజయాల పక్కనే ఈ సమాచారం కనిపిస్తుంది.

మరో ఉదాహరణ Farcaster, ఇది ఒక వికేంద్రీకృత సోషల్ నెట్‌వర్క్. చాలా Web3 యాప్‌ల లాగే, గుర్తింపును సున్నా నుంచి మొదలుపెట్టకుండా మీ వాలెట్ కలిపి, మీ ENS పేరు, ప్రొఫైల్ చిత్రం చూపడానికి ఇది వీలు కల్పిస్తుంది. ఒకే ఆన్‌చైన్ గుర్తింపు యాప్‌ల మధ్య మీ వెంటే ప్రయాణిస్తుంది.

ఆసక్తికర విషయం: 2017లో ప్రారంభమైన నాటి నుంచి ENS మిలియన్ల కొద్దీ .eth పేర్లను నమోదు చేసింది. 🐂

ఆన్‌చైన్ పౌరులుగా మారి మన వికేంద్రీకృత భవిష్యత్తుకు రూపమివ్వాల్సిన సమయం ఇది. మీ ENS పేరు నమోదు చేసుకునే సమయం ఇది. ఈ ప్రక్రియలో మేము మీకు తోడుంటాం, దాని కీలక ఫీచర్‌లు అందుకోవడంలో సాయపడతాం. Bankless Academy లాంటి అనేక ఆన్‌చైన్ యాప్‌లలో కనిపించేలా ప్రొఫైల్ చిత్రం పెట్టుకోవడం కూడా అందులో ఉంది.

ఈ ప్రక్రియ GoDaddy లేదా Namecheap లాంటి వేదికలో .com వెబ్‌సైట్ చిరునామా నమోదు చేయడం లాంటిదే. ఒక ప్రత్యేక పేరు ఎంచుకుని, రెండు బ్లాక్‌చైన్ లావాదేవీలు పంపితే సరిపోతుంది.

ముందస్తు అవసరాలు

1. క్రిప్టో వాలెట్ సృష్టించండి

మీ ENS పేరు కొని ఉంచుకోవాలంటే, ఇంకా వాలెట్ లేకపోతే ఒకటి సిద్ధం చేసుకోవాలి. మా చిన్న గైడ్ ‘క్రిప్టో వాలెట్ తయారు చేయడం’ చూసి 5 నిమిషాల్లో వాలెట్ సృష్టించుకోండి.

2. Ethereum మెయిన్‌నెట్‌లో మీ వాలెట్‌లో ETH ఉందని నిర్ధారించుకోండి

కేంద్రీకృత ఎక్స్‌ఛేంజ్ నుంచి క్రిప్టోకరెన్సీ పంపి, లేదా MoonPay, Transak లాంటి సేవలు వాడి మీ వాలెట్‌కు డబ్బు జమ చేయవచ్చు. నమోదు ఫీజు ETH-లో చెల్లిస్తారు.

దశలవారీ గైడ్

1. ENS Manager App తెరిచి మీ వాలెట్ కనెక్ట్ చేయండి.

2. మీకు కావలసిన పేరును వెతికి ఎంచుకోండి.

3. మీ నమోదు వ్యవధిని ఎంచుకోండి.

మీ ENS పేరును ఎప్పటికప్పుడు రెన్యూ చేసుకోవాలి. గడువు ముగియకముందే గుర్తు చేసేలా మీ సొంత క్యాలెండర్‌లో రిమైండర్ పెట్టుకోండి.

4. మీ చెల్లింపు వివరాలు సరిచూసుకోండి.

నమోదు ఫీజు, గ్యాస్ రెండూ మీ వాలెట్‌లోని ETH బ్యాలెన్స్ నుంచే చెల్లుతాయి.

ఐచ్ఛికం: ఈ దశలోనే మీ డొమైన్‌ను ప్రైమరీ నేమ్గా పెట్టుకోండి. అంటే Bankless Academy, Farcaster, ENS మద్దతున్న ఇతర వేదికలలో మీ పొడవాటి వాలెట్ చిరునామా బదులు మీ ENS పేరు, ప్రొఫైల్ చిత్రం కనిపిస్తాయి.

5. ముందున్న నమోదు దశలను సరిచూసుకోండి.

6. మొదటి లావాదేవీపై సంతకం చేసి 60 సెకన్ల టైమర్ మొదలుపెట్టండి.

మీ నమోదు ప్రక్రియను ఇతరులు ఫ్రంట్-రన్నింగ్ చేయకుండా ఈ మొదటి లావాదేవీ అడ్డుకుంటుంది.

7. టైమర్ పూర్తయ్యే వరకూ వేచి ఉండండి.

8. రెండో లావాదేవీపై సంతకం చేయండి.

మీ కొత్త ENS పేరుపై యాజమాన్యాన్ని ఖాయం చేసి, దాన్ని మీ వాలెట్‌కు పంపే లావాదేవీ ఇదే.

9. విజయవంతం!

ఇప్పుడు మీ ENS పేరు మీ వాలెట్‌లో ERC-721 టోకెన్‌గా ఉంటుంది.

https://etherscan.io/ తెరిచి, చిరునామా సెర్చ్ బార్‌లో మీ ENS పేరు టైప్ చేసి, అది మీ వాలెట్ చిరునామాకు మళ్లిస్తోందో లేదో సరిచూసుకోవచ్చు; దీనికి కొన్ని నిమిషాలు పట్టవచ్చు. ఇది పనిచేయడం మొదలయ్యాక, మీ ENS పేరును స్నేహితులతో పంచుకోవచ్చు, Ethereum యాప్‌లతో కలపవచ్చు.

మీ కొత్త ENS పేరును ఇంకెన్ని విధాలుగా వాడవచ్చో తెలుసుకోవడానికి కింది ‘తరచుగా అడిగే ప్రశ్నలు’ విభాగం చూడటం మర్చిపోవద్దు!

ముగింపు

మీ Web3 యూజర్‌నేమ్ నమోదు చేయడం ద్వారా వికేంద్రీకృత వెబ్‌లో స్వయం సార్వభౌమత్వాన్ని మీరు స్వీకరిస్తున్నారు, మీ ఆన్‌చైన్ గుర్తింపు మీ ఒక్కరిదే అయ్యే భవిష్యత్తు వైపు అడుగు వేస్తున్నారు. ENS మీ Web3 యూజర్‌నేమ్‌గానూ, వాలెట్ చిరునామాగానూ పనిచేసి, డిజిటల్ ప్రపంచంలో మీ ఉనికిని చాటుతుంది. ఆన్‌చైన్ యాప్‌లతో ఇది సునాయాసంగా కలుస్తుంది, ప్రతి లావాదేవీతో మీ గుర్తింపును ప్రతిబింబిస్తూ నిర్మిస్తుంది.

మీ ఆన్‌చైన్ గుర్తింపు ఒకసారి ఏర్పడ్డాక అది పూర్తిగా మీ కస్టడీలోనే ఉంటుంది, దాన్ని రెన్యూ చేసుకోవడం మీ బాధ్యతే. అధికార దుర్వినియోగం లేని, వినియోగదారుకు శక్తినిచ్చే ఇంటర్నెట్ నిర్మాణంలో ENS స్వీకరణ కీలకం. ENS-తో వికేంద్రీకృత వెబ్‌లో మీరు చేసే ప్రతి పని మీ ప్రత్యేక ఆన్‌చైన్ వ్యక్తిత్వానికి సాక్ష్యమే.

ENS-తో మీ ఆన్‌చైన్ గుర్తింపుపై పట్టు సాధించే సమయం ఇది. ఎక్స్‌ప్లోరర్ హ్యాండ్‌బుక్‌లోని ఈ అధ్యాయం ‘మీ Web3 యూజర్‌నేమ్ నమోదు చేయడం’ మీకు నచ్చిందని ఆశిస్తున్నాం.

మీ ప్రయాణంలో సులభంగా చూసుకోవడానికి ఒక కాపీ సొంతం చేసుకోవాలన్నా, Bankless Academy భవిష్యత్ కంటెంట్‌కు తోడ్పడాలన్నా ఈ అధ్యాయాన్ని సేకరించడం మర్చిపోవద్దు. ప్రయాణం సురక్షితంగా సాగాలి, ఎక్స్‌ప్లోరర్!

తరచుగా అడిగే ప్రశ్నలు

ప్రైమరీ నేమ్ అంటే ఏమిటి?

మీ ప్రైమరీ నేమ్ మీ ఆన్‌చైన్ వాలెట్ చిరునామాకు ముద్దుపేరు లాంటిది, సంక్లిష్టమైన Ethereum వాలెట్ చిరునామాను ఇది సులభం చేస్తుంది. ప్రైమరీ నేమ్ పెట్టడం ద్వారా, దాన్ని మీ ప్రొఫైల్ చిత్రంతో పాటు వాడటానికి, చూపడానికి వివిధ యాప్‌లకు అనుమతి ఇస్తారు. ఇక్కడ మరింత తెలుసుకోండి!

నా ఈమెయిల్, వెబ్‌సైట్, సోషల్ మీడియా నా ENS పేరుతో లింక్ చేయవచ్చా?

తప్పకుండా! మీ పాస్‌పోర్ట్‌లో మీ గురించి రకరకాల వివరాలు ఉన్నట్టే, మీ ENS పేరు కూడా అనేక వ్యక్తిగత సమాచారంతో లింక్ కాగలదు. మీ ఈమెయిల్, సొంత వెబ్‌సైట్, ప్రొఫైల్ చిత్రం, సోషల్ మీడియా హ్యాండిల్‌లు ఇందులో ఉంటాయి.

ఈ స్టాండర్డ్ రికార్డ్‌లు మీ సంప్రదింపు సమాచారాన్ని వికేంద్రీకృత పద్ధతిలో బహిరంగంగా పంచుకోవడానికి వీలు కల్పిస్తాయి. అవి ఆన్‌చైన్‌లో నిల్వ ఉంటాయి, ENS పేర్లను గుర్తించే ఏ యాప్ ద్వారానైనా వాటిని చూడవచ్చు.

మీ ENS పేరుకు రికార్డ్‌లు ఎలా పెట్టాలో, ఏ రకం రికార్డ్ దేనికి పనికొస్తుందో తెలిపే సులభమైన గైడ్ కోసం ఈ వ్యాసం చూడండి.

ENS పేరు నమోదు చేయడానికి ఎంత ఖర్చవుతుంది?

ప్రస్తుతం ENS పేర్ల నమోదు ధరలు ఇలా ఉన్నాయి:

• 5 లేదా అంతకంటే ఎక్కువ అక్షరాల పేర్లు: ఏడాదికి $5 విలువైన ETH.

• 4 అక్షరాల పేర్లు: ఏడాదికి $160 విలువైన ETH.

• 3 అక్షరాల పేర్లు: ఏడాదికి $640 విలువైన ETH.

Ethereum నెట్‌వర్క్‌తో వ్యవహరించడానికి పడే లావాదేవీ గ్యాస్ ఫీజులు ఇందులో లేవు, వాటి సుమారు అంచనా ENS Manager Appలో కనిపిస్తుంది. కస్టమ్ రికార్డ్‌లు పెట్టడం లాంటి ఆన్‌చైన్ డేటా మార్పులకు అదనపు గ్యాస్ ఫీజు అవసరం. పొట్టి పేర్లు అరుదు కాబట్టి వాటి ధరలు ఎక్కువ. ఈ ఫీజులు ఊహాజనిత నమోదులను అడ్డుకుంటాయి, ENS అభివృద్ధికి DAO-కు తోడ్పడతాయి.

ఒకే ENS పేరుతో పలు వాలెట్ చిరునామాలను కలపవచ్చా?

తప్పకుండా! 'yourname.eth' లాంటి ఒకే ENS పేరుకు పలు వాలెట్ చిరునామాలను జోడించవచ్చు, లేదా ఏ చిరునామా ఏ క్రిప్టోకరెన్సీదో తెలిసేలా 'ethereum.yourname.eth', 'bitcoin.yourname.eth' లాంటి వేర్వేరు సబ్‌నేమ్‌లుగా వాటిని విడదీయవచ్చు.

ఈ రెండింటిలో ఏదైనా ENS Manager App ద్వారా ఏర్పాటు చేసుకోవచ్చు. మరిన్ని వివరాల కోసం, దశలవారీ సూచనల కోసం ఈ గైడ్ చూడండి

నా ప్రస్తుత వెబ్‌సైట్ చిరునామాను ENS పేరుగా వాడవచ్చా?

అవును, web3explorer.com లాంటి వెబ్‌సైట్ మీ సొంతమైతే, web3explorer.eth బదులు దాన్నే వాడవచ్చు. ENS, GoDaddy కలిసి నిర్మించిన మౌలిక వసతి వల్ల ఇది సాధ్యం.

మరింత తెలుసుకోవడానికి ENS Labs బ్లాగ్ పోస్ట్ చూడండి.

రచన

Marcus ENS DAO Newsletter ప్రచురిస్తారు. ప్రోటోకాల్ ఫీజుల ద్వారా వచ్చే మిగులు ఆదాయం అప్లికేషన్ లేయర్ అభివృద్ధికి, ఇతర ఓపెన్ సోర్స్ మౌలిక వసతికి ఎలా తోడ్పడగలదో పరిశోధిస్తారు.

Tetranome Bankless Academy-లో Content & Design Lead. నేర్చుకునే ప్రయాణం, యూజర్ ఇంటర్‌ఫేస్, అనుభవం, వేదిక కళాకృతులపై దృష్టి పెడతారు.

తోడ్పాటు

ఈ దశలవారీ గైడ్‌ను Bankless Academy అందిస్తోంది.