பரவலாக்கப்பட்ட எக்ஸ்சேஞ்ச்கள்

பரவலாக்கப்பட்ட எக்ஸ்சேஞ்ச் என்றால் என்ன?

பரவலாக்கப்பட்ட எக்ஸ்சேஞ்ச்கள் (DEX-கள்) என்பவை ஆன்செயின் சந்தைகள். வாலெட்டில் உள்ள நிதியை செல்ஃப்-கஸ்டடியில் வைத்தபடியே, எக்ஸ்ப்ளோரர்கள் மற்ற பயனர்களுடன் கிரிப்டோகரன்சியைப் பாதுகாப்பாகப் பரிமாறிக்கொள்ளலாம். இந்த பியர்-டு-பியர் டிரேட்டுகள், அனைவரும் அணுகக்கூடிய ஸ்மார்ட் ஒப்பந்தங்கள் மூலம் நடக்கின்றன. அவை பயனர்களை டோக்கன்களின் பெரிய கூட்டுப் பெட்டகங்களுடன் இணைக்கின்றன. இந்தப் பெட்டகங்கள் பணப்புழக்கப் பூல்கள் எனப்படும். கிட்டத்தட்ட எந்தப் பிளாக்செயினிலும் DEX-கள் உள்ளன; Ethereum Layer 1, Layer 2 இரண்டிலும் அவை இருக்கின்றன.

டோக்கன் பரிமாற்றம் DeFi பயன்பாட்டின் இன்றியமையாத பகுதி. வேறு எந்த வகை எக்ஸ்சேஞ்சிலும் இல்லாத அளவு டோக்கன் வகைகளையும் பயன்களையும் DeFi-இல் காணலாம். சிலர் ஆன்செயின் தயாரிப்புகளையும் சேவைகளையும் அணுகத் டோக்கன் வாங்குகிறார்கள். சிலர் முதலீடாக வாங்குகிறார்கள். ஒரு நிறுவனத்தின் பங்குகளைப் போலவே, சில டோக்கன்கள் திட்டத்தின் திசையை முடிவு செய்யும் வாக்குரிமையை வழங்குகின்றன! உங்கள் நோக்கம் எதுவாக இருந்தாலும், DeFi-இல் அடிக்கடி DEX-களுக்குச் செல்வீர்கள்.

அவை எப்படி வேலை செய்கின்றன, உங்களுக்கு எப்படிச் சிறப்பாகப் பயன்படும் என்று பார்ப்போம்.

மையப்படுத்தப்பட்ட, பரவலாக்கப்பட்ட எக்ஸ்சேஞ்ச்கள்

மையப்படுத்தப்பட்ட எக்ஸ்சேஞ்ச் (Coinbase, Binance, Kraken போன்றவை) பயன்படுத்தும் தொழில்நுட்பத்துக்கும், பரவலாக்கப்பட்ட எக்ஸ்சேஞ்ச் (Uniswap, PancakeSwap போன்றவை) பயன்படுத்தும் தொழில்நுட்பத்துக்கும் இடையிலான வேறுபாடுகளைப் பார்ப்போம்.

மையப்படுத்தப்பட்ட எக்ஸ்சேஞ்ச்கள் (CEX-கள்) பிளாக்செயின் சூழலில் நேரடியாக ஈடுபடாமலேயே கிரிப்டோகரன்சி டிரேட், முதலீடு இரண்டையும் அனுமதிக்கின்றன. உங்கள் அக்கவுண்ட் CEX-இல் பதிவாகி இருப்பதால், உங்கள் தனிப்பட்ட விசைகளும் நிதியும் அவர்களின் காவலில் இருக்கும்: அவர்களின் நிர்வாகம், விதிகள், வணிக மாதிரி சார்ந்த ரிஸ்க்குகளுக்கு நீங்கள் உட்பட்டவர்.

பரவலாக்கப்பட்ட எக்ஸ்சேஞ்ச்கள் (DEX-கள்) முழுக்க முழுக்க செல்ஃப்-கஸ்டடியில் கிரிப்டோகரன்சி டிரேட் செய்ய வழிவகுக்கின்றன: பிளாக்செயின்களின் அசல் நோக்கமும் இதுவே. பியர்-டு-பியர் மாதிரியில் நீங்கள் நுகர்வோராகவும் வழங்குநராகவும் செயல்படலாம்; முன்பு நிதி வர்க்கத்துக்கு மட்டுமே கிடைத்த வாய்ப்புகளை அணுகலாம். பிளாக்செயின் அமைப்பு வெளிப்படையானது, தணிக்கை-எதிர்ப்பு கொண்டது: உங்கள் அணுகலை யாரும் முடக்க முடியாது, உங்கள் டிரேட்டுகளைத் திரும்பப் பெற முடியாது. ஹேக் ரிஸ்க் இருக்கிறது; அதை இந்தப் பாடத்தில் பின்னர் பார்ப்போம்.

அறிவுச் சோதனை 1

கிரிப்டோகரன்சி எக்ஸ்சேஞ்ச்கள் குறித்து பின்வருவனவற்றுள் எது உண்மை?

• [ ] DEX-க்குப் பின்னால் எந்தக் குழுவும் இல்லை.

• [ ] மோசமான டிரேட்டால் மட்டுமே CEX-இல் நிதியை இழக்க முடியும்.

• [ ] DEX-களில் செல்ஃப்-கஸ்டடியில் டிரேட் செய்யலாம், CEX-களில் முடியாது.

பரவலாக்கப்பட்ட ஆப்கள்

DEX-கள் ஒரு வகை dApp, அதாவது பிளாக்செயினில் இயங்கும் பரவலாக்கப்பட்ட ஆப். ஒரு இணைய ஆப்பை 'பரவலாக்கப்பட்டது' எனக் கருத மூன்று தேவைகள்: பாகுபாடின்றி யாரும் அதைப் பயன்படுத்த அனுமதிக்க வேண்டும்; இன்னொரு நபரின் தேவையின்றி பயனர் செயல்களைச் செயலாக்க வேண்டும்; பொதுவில் வெளிப்படையான குறியீட்டில் எழுதப்பட்டிருக்க வேண்டும்.

dApp சேவைகள் ஸ்மார்ட் ஒப்பந்தங்கள் மூலம் நடக்கின்றன. இவை பயனரின் ஆன்செயின் செயலை எடுத்து, எதிர்பார்க்கக்கூடிய ஆன்செயின் பதிலைத் தரும் குறியீட்டு வரிகள். Ethereum Foundation ஸ்மார்ட் ஒப்பந்தங்களை வெண்டிங் மெஷினுடன் ஒப்பிடுகிறது: பயனர் தனக்கு வேண்டிய பொருளின் எண்ணையும் சரியான தொகையையும் உள்ளிடுகிறார்; இன்னொரு மனிதரின் உதவியின்றி எதிர்பார்த்த வெளியீடு (அவரது தின்பண்டம்) கிடைக்கிறது.

DEX ஸ்மார்ட் ஒப்பந்தங்கள் பல கட்டளைகளைக் கையாளுகின்றன: டோக்கன் ஸ்வாப், வாக்களிப்பு, பணப்புழக்கம் சேர்த்தல் அல்லது நீக்குதல்.

பரவலாக்கப்பட்ட ஆப்கள் (தொடர்ச்சி)

DEX-களும் வெண்டிங் மெஷின் தர்க்கத்தையே பின்பற்றுகின்றன: பயனரின் உள்ளீட்டு டோக்கனை எடுத்து, விரும்பிய டோக்கனை வெளியிடுகின்றன. மற்ற dApp எடுத்துக்காட்டுகள்:

🎟️ வாக்களிப்பு dApp-கள்: பயனரின் வாக்கைக் குறிப்பிட்ட ஒன்றுக்கு ஒதுக்குதல்.

📦 பிரிட்ஜ் dApp-கள்: பயனரின் கிரிப்டோகரன்சியை ஒரு பிளாக்செயின் நெட்வொர்க்கிலிருந்து இன்னொன்றுக்கு மாற்றுதல்.

🤝 கடன் dApp-கள்: குறிப்பிட்ட தகுதிகளைப் பூர்த்தி செய்யும் பயனர்களுக்குக் கடன் வழங்குதல்.

ஸ்மார்ட் ஒப்பந்தங்கள் Ethereum-இல் அக்கவுண்டுகள்: அவற்றுக்கு முகவரியும் இருப்பும் உண்டு; பரிமாற்றமும் கட்டளையும் வந்தவுடன் தானாகச் செயல்படுகின்றன. ஒரு DEX என்பது பல செயல்பாடுகளைக் கொண்ட, நிரல் எழுதப்பட்ட Ethereum அக்கவுண்ட்.

dApp-கள் பொதுவாக ஓர் இணையதளத்தைக் காட்சி இடைமுகமாகப் பயன்படுத்துகின்றன; அது அடிப்படை ஸ்மார்ட் ஒப்பந்தங்களுடன் தொடர்பு கொள்ள உதவுகிறது. இணையதளம் செயலிழந்தாலும், சிறிது அனுபவம் இருந்தால் ஸ்மார்ட் ஒப்பந்தத்தை நேரடியாக அணுகலாம்!

அறிவுச் சோதனை 2

ஒரு dApp பரவலாக்கப்பட்டதாகக் கருதப்பட எந்தப் பண்புகள் தேவை?

• [ ] அனுமதி தேவையில்லாதது: எல்லா பயனர்களுக்கும் திறந்த அணுகல்.

• [ ] தன்னாட்சி கொண்டது: பயனர் செயல்களுக்கு இடைத்தரகர் தேவையில்லை.

• [ ] வெளிப்படையானது: ஸ்மார்ட் ஒப்பந்தக் குறியீடு பொதுவில் கிடைக்கிறது.

• [ ] மேற்கண்ட அனைத்தும்

ஆட்டோமேட்டட் மார்க்கெட் மேக்கர்கள்

பாரம்பரிய சந்தைகளிலும் CEX-கள் உள்ளிட்ட எக்ஸ்சேஞ்ச்களிலும், உங்கள் கஸ்டோடியன் ஓர் ஆர்டர் புக் பயன்படுத்துகிறார்: வாங்கும், விற்கும் சலுகைகள் நிறைந்த தரவுத்தளம். உங்கள் டிரேட் சலுகையை இன்னொருவரின் சலுகையுடன் CEX இணைக்கிறது. வழக்கமாக ஒரு கமிஷன் வசூலிக்கப்படுகிறது; வெளியிடப்படாத அந்தப் பொருத்தும் முறை உங்களுக்குச் சிறந்த விலையைத் தந்ததா என்பது தெரியாமலே இருக்கும்.

பெரும்பாலான DEX-கள் 'ஆட்டோமேட்டட் மார்க்கெட் மேக்கர்' (AMM) தொழில்நுட்பத்தைப் பயன்படுத்துகின்றன; டோக்கன் ஸ்வாப்புக்கான மிகப் பொதுவான வடிவமைப்பு இதுவே. இது ஒரு பொது அல்காரிதம் மூலம் உங்கள் டிரேட்டுக்கு விலை நிர்ணயிக்கிறது. சில புதிய DEX-கள் ஆர்டர் புக் அல்லது நோக்கம் சார்ந்த அமைப்புகளைப் பயன்படுத்துகின்றன. AMM அல்காரிதம் ஓபன் சோர்ஸ் என்பதால், யாரும் அதைப் புரிந்துகொள்ளலாம், நகலெடுக்கலாம், மேம்படுத்தலாம்; இது ஆரோக்கியமான போட்டியையும் தொடர்ச்சியான புதுமையையும் உருவாக்குகிறது.

பயனர்களின் ஏலங்களை நேரடியாகப் பொருத்தாமல், AMM-கள் டிரேட்டுகளை பணப்புழக்கப் பூல்கள் வழியாக அனுப்புகின்றன. இந்தக் கூட்டு டோக்கன் பெட்டகங்கள் பயனர் செயல்களுக்கு ஏற்ப டோக்கன்களைச் சேர்க்கின்றன, வழங்குகின்றன; ஒவ்வொரு படியும் பொது பிளாக்செயினில் தெரியும்.

அறிவுச் சோதனை 3

பாரம்பரிய ஆர்டர் புக்குடன் ஒப்பிடும்போது AMM-களின் நன்மை என்ன?

• [ ] ஆர்டர் புக் டிரேட்டைவிட AMM டிரேட் வேகமானது.

• [ ] AMM-கள் உங்களை மற்ற பயனருடன் நேரடியாக இணைக்கின்றன.

• [ ] ஒருதலைப்பட்சமான டிரேட்டுகளைக் கண்டறிந்து தடுக்கலாம்.

டோக்கன் ஸ்வாப்புகள்

பிளாக்செயினில் நடக்கும் கிரிப்டோகரன்சி டிரேட்டுகள் டோக்கன் ஸ்வாப்புகள் எனப்படும். இந்த ஸ்மார்ட் ஒப்பந்தச் செயல்கள், AMM பணப்புழக்கப் பூல்கள் மூலம் ஒரு கிரிப்டோகரன்சியை இன்னொன்றாக மாற்றுகின்றன. பொருத்தமான பூல்கள் வழியாகச் செல்லும் ஒரு டிரேட் பாதையை உருவாக்கி, DEX ஸ்மார்ட் ஒப்பந்தம் உங்கள் உள்ளீட்டு டோக்கனை விரும்பிய டோக்கனாக மாற்றுகிறது. ஒரு பூலில் வழக்கமாக இரண்டு டோக்கன்கள் மட்டுமே இருக்கும், ஒவ்வொரு டோக்கன் ஜோடிக்கும் பூல் இருப்பதில்லை; அதனால் ஒரு பாதை பல பூல்கள் வழியாகச் செல்லலாம்.

ஒரு ஸ்மார்ட் ஒப்பந்தம் நம் வாலெட்டை அணுக, குறிப்பிட்ட (அல்லது வரம்பற்ற) தொகை வரை எடுக்க அனுமதி தருகிறோம். இந்த டோக்கன் செலவு வரம்புகள், நம்பகமான ஒப்பந்தங்கள் நமது தனிப்பட்ட விசை இல்லாமலேயே பரிவர்த்தனைகளை நிறைவேற்ற உதவுகின்றன. அனுமதி வழங்க கேஸ் செலவாகும், அதனால் அனுமதிகள் எதிர்காலப் பயன்பாட்டுக்காகத் திறந்தே இருக்கும்: ஒரு வாலெட்டில் டிரேட் செய்து இன்னொன்றில் சேமிப்பதற்கு இதுவும் ஒரு காரணம். அனுமதிகளைக் கண்காணித்து ரத்து செய்வதை டோக்கன் செலவு வரம்புகளை நிர்வகித்தல் பாடத்தில் பார்ப்போம்!

டோக்கன் ஸ்வாப்புகள் (தொடர்ச்சி)

அனுமதி, பரிமாற்ற செயல்முறையைப் புரிந்துகொள்ள ஓர் எடுத்துக்காட்டைப் பார்ப்போம். Optimism நெட்வொர்க்கில் உள்ள பெரிய DEX ஆன Velodrome-இல் USDC-ஐ OP ஆக ஸ்வாப் செய்வது இதற்கு எடுத்துக்காட்டு. USDC/OP பணப்புழக்கப் பூல் அவ்வளவு செலவு-திறன் மிக்கது அல்ல என்பதால், இந்த டிரேட் பெரும்பாலும் இரண்டு பூல்கள் வழியாக அனுப்பப்படுகிறது:

1. முதலில், உங்கள் வாலெட்டிலிருந்து USDC எடுக்க Velodrome-இன் தகுந்த ஸ்மார்ட் ஒப்பந்தத்துக்கு அனுமதி வழங்குகிறீர்கள்.
2. உங்கள் ஸ்வாப் பரிவர்த்தனைக் கோரிக்கையை Velodrome-க்கு சமர்ப்பிக்கிறீர்கள்.
3. பரிவர்த்தனை ஏற்கப்படுகிறது: குறிப்பிட்ட அளவு USDC-ஐ உங்கள் வாலெட்டிலிருந்து Velodrome எடுத்து USDC/ETH பூலுக்கு அனுப்புகிறது. அதற்கு இணையான ETH இந்த முதல் பூலிலிருந்து வெளியேறி ETH/OP பூலுக்கு மாற்றப்படுகிறது. இறுதியாக, இரண்டாவது பூலிலிருந்து OP உங்கள் வாலெட் முகவரிக்கு வருகிறது.

ஸ்வாப் பரிவர்த்தனை முடிந்தது. உங்கள் USDC டோக்கன்கள், ETH வழியாக OP ஆக ஸ்வாப் செய்யப்பட்டன!

அறிவுச் சோதனை 4

ஒரே பரிவர்த்தனையில் பல பணப்புழக்கப் பூல்கள் வழியாக ஒரு டிரேட்டை AMM-கள் அனுப்ப முடியும்.

• [ ] உண்மை

• [ ] பொய்

பணப்புழக்கம் என்றால் என்ன?

கிரிப்டோ உலகில் பணப்புழக்கம் என்பது, நியாயமான விலையில் டிஜிட்டல் சொத்துகளை வாங்க, விற்க ஒரு சந்தை அளிக்கும் திறன். பணப்புழக்கம் அதிகமாக இருக்கும்போது விலைகள் நிலையாக இருக்கும்; குறைவாக இருக்கும்போது விலைகள் ஏற்ற இறக்கமாக இருக்கும். நியாயமான விலைகளே பயனர்களை ஈர்ப்பதால், DEX-கள் தங்கள் எல்லா பூல்களிலும் அதிக பணப்புழக்கத்தை இலக்காகக் கொள்கின்றன.

அதிக பணப்புழக்கம் என்றால் பூலில் அதிக டோக்கன்கள் இருக்கின்றன, பொதுவாக இரண்டு டோக்கன்களுக்கும் 50/50 மதிப்புப் பங்கீடு. எடுத்துக்காட்டாக, USDC/ETH பூல் அந்தத் தளத்தில் இந்த டோக்கன் ஜோடி இடையிலான எல்லா டிரேட்டுகளையும் நடத்துகிறது. டோக்கன்கள் அதிகமாக இருக்கும்போது, பூல் வழியாக டிரேட் செய்பவர்கள் 50/50 சமநிலையில் ஏற்படுத்தும் தாக்கம் குறைவு; அதனால் விலைகள் நிலையாக இருக்கும். ஒரு டிரேட் இந்தச் சமநிலையைக் குலைக்கும் அளவே விலைத் தாக்கம் எனப்படும்.

ஓர் எக்ஸ்ப்ளோரராக, சிறந்த விலை கிடைக்க உங்கள் டிரேட்டுகளில் விலைத் தாக்கம் மிகக் குறைவாக இருக்க வேண்டும்! அதாவது, அதிக, சமச்சீரான பணப்புழக்கம் வேண்டும்.

பணப்புழக்கம் வழங்குநர்கள்

அதிக பணப்புழக்கம் DEX-இன் வெற்றிக்கு இன்றியமையாதது. ஆனால் கிரிப்டோகரன்சிச் சூழலில் இருக்கும் பணப்புழக்கம் குறிப்பிட்ட அளவே; அதனால் ஒவ்வொரு DEX-ம் முடிந்தவரை அதிக பணப்புழக்கத்தைக் கவரப் போட்டியிடுகிறது. இந்தப் பணப்புழக்கம் எங்கிருந்து வருகிறது?

பரவலாக்கப்பட்ட சூழலில், ஒரு தளத்தின் TVL (total value locked) உயர DeFi குடிமக்கள் பூல்களுக்குப் பணப்புழக்கம் வழங்க ஊக்குவிக்கப்படுகிறார்கள். பூல் வழியாக டிரேட் செய்யும் பயனர்களிடம் வசூலிக்கப்படும் கட்டணம், வழங்கிய பணப்புழக்க அளவின் அடிப்படையில் LP-களுக்கு (liquidity providers) பகிர்ந்தளிக்கப்படுகிறது. ஆம், சரியாகத்தான் கேட்டீர்கள்: உங்கள் டோக்கன்களை ஒரு DEX பூலுக்குக் கடனாகத் தந்து செயலற்ற வருமானம் ஈட்டலாம்.

LP ஆவதற்குப் பல விஷயங்களைக் கருத்தில் கொள்ள வேண்டும்; அதை எதிர்கால உள்ளடக்கத்தில் பார்ப்போம். இப்போதைக்கு, DEX பூல்களில் காட்டப்படும் பெரிய APR-கள் (annual percentage rates) உறுதியானவை அல்ல, இழப்புகளும் ஏற்படலாம் என்பதை அறிந்துகொள்ளுங்கள்.

அறிவுச் சோதனை 5

வாக்கியத்தை முடியுங்கள்: “பணப்புழக்கம் __________.”

• [ ] அதிகமாக இருக்கும்போது, ஏற்ற இறக்கம் அதிகம்.

• [ ] குறைவாக இருக்கும்போது, ஏற்ற இறக்கம் குறைவு.

• [ ] குறைவாக இருக்கும்போது, ஏற்ற இறக்கம் அதிகம்.

அறிவுச் சோதனை 6

பணப்புழக்கம் வழங்க DEX-கள் பயனர்களை எப்படி ஊக்குவிக்கின்றன?

• [ ] டிரேட் இழப்புகளுக்குக் காப்பீடு.

• [ ] தளக் கட்டணத்தில் ஒரு பங்கு, போனஸ் டோக்கன்கள் அல்லது இரண்டும்.

• [ ] தனிப்பட்ட பணப்புழக்கப் பூல்களுக்கான அணுகல்.

• [ ] மேற்கண்ட அனைத்தும்

தளக் கட்டணங்கள்

CEX-களும் DEX-களும் தங்கள் சேவைகளுக்குக் கட்டணம் வசூலிக்கின்றன; பிளாக்செயினைப் பயன்படுத்துவதும் இலவசம் அல்ல. ஒரு தளத்தைத் தேர்ந்தெடுக்கும்போது கருத்தில் கொள்ள வேண்டிய ஐந்து பொதுவான செலவுகள் இங்கே.

🏷️ தளக் கட்டணம்: CEX-கள் தங்கள் டிரேடிங் கமிஷனைத் தாங்களே நிர்ணயிக்கின்றன; DEX பூல் கட்டணம் பூலுக்குப் பூல் மாறுபடும் (பொதுவாக ஒரு சதவீதத்தின் சிறு பகுதி). முக்கிய வேறுபாடு: DEX கட்டணங்கள் ஆன்செயினில் யாரும் பார்க்கும்படி இருக்கும்.

🌐 நெட்வொர்க் கட்டணம்: dApp பரிவர்த்தனைக்கு மேல் பிளாக்செயின்கள் கேஸ் கட்டணம் வசூலிக்கின்றன. அமைதியான நேரங்களில் நெட்வொர்க்கைப் பயன்படுத்தி இந்தச் செலவைக் குறைக்கலாம். Ethereum மெயின்நெட்டுக்கான நேரலை கேஸ் மதிப்பீட்டுக் கருவி: Etherscan.io. Layer 2-இல் கட்டணம் மிகக் குறைவு; நெட்வொர்க்குகளை growthepie தளத்தில் ஒப்பிடுங்கள்.

📦 பிரிட்ஜ் கட்டணம்: ஒரு பிளாக்செயின் நெட்வொர்க்கிலிருந்து இன்னொன்றுக்குக் கிரிப்டோகரன்சி மாற்றுவதற்கு CEX-களும் பிரிட்ஜ்களும் கட்டணம் வசூலிக்கின்றன. CEX-க்கு அவர்களின் தளத் தகவலைப் பாருங்கள். பிரிட்ஜ் dApp-கள் உறுதி செய்வதற்கு முன் கட்டண மதிப்பீட்டைக் காட்டும்.

💹 பரிமாற்ற விகிதம்: CEX-இலோ DEX-இலோ ஃபியட் கொண்டு நேரடியாகக் கிரிப்டோகரன்சி வாங்கும்போது, சந்தை விகிதத்தைப் பிரதிபலிக்காத பரிமாற்ற விகிதங்கள் குறித்து எச்சரிக்கையாக இருங்கள்.

🧊 ஸ்லிப்பேஜ்: விலைகள் வேகமாக மாறுவதால், ஸ்வாப்பில் ஏற்ற இறக்கத்துக்கு DEX-கள் இடம் விடுகின்றன; இது ஸ்லிப்பேஜ் எனப்படும் (மாற்றக்கூடியது, பொதுவாக 0.5-2%). ஒரு டிரேட்டில் அந்த அளவு வரை இழக்கலாம்; ஆனால் மிகக் குறைவாக அமைத்தால் டிரேட் நிராகரிக்கப்படலாம்.

டிரேட் செய்வதற்கு முன் எப்போதும் சொந்தமாக ஆராயுங்கள்; தளத்தின் செலவுகளையும் சமரசங்களையும் புரிந்துகொள்ளுங்கள்.

DEX-களின் நன்மைகள்

இந்தப் பாடத்தில் நிறையக் கோட்பாடுகளைப் பார்த்தோம்; ஆனாலும் DEX-கள் உங்களுக்குப் பொருத்தமா என்ற கேள்வி இருக்கலாம். பொதுவாகச் சொன்னால், பின்வரும் நிலைகளில் பரவலாக்கப்பட்ட எக்ஸ்சேஞ்ச்கள் உங்களுக்குப் பயன்படும்:

• 🔑 உங்கள் டிஜிட்டல் சொத்துகள் மீதான கட்டுப்பாட்டை நீங்களே வைத்திருக்க விரும்பினால்.
• 🔒 CEX சரிவுகளைத் தவிர்த்து, சொத்துகளைப் பிளாக்செயினில் பாதுகாக்க விரும்பினால்.
• ⌛ கிரிப்டோகரன்சிச் சந்தையை எப்போதும் அணுக விரும்பினால்.
• 👛 பரந்த வகைக் கிரிப்டோகரன்சிகளை அணுக விரும்பினால்.
• 🤑 பணப்புழக்கம் வழங்குவதில் ஆர்வம் இருந்தால்.
• 🛂 ஒவ்வொரு தளத்திலும் பதிவு செய்து KYC செய்ய விரும்பாவிட்டால்.
• ⚔️ பரவலாக்கப்பட்ட நிதி உலகின் கூடுதல் ரிஸ்க்குகளையும் வெகுமதிகளையும் தேடினால்.

இருந்தாலும், கிட்டத்தட்ட எல்லா DeFi பயனர்களுக்கும் ஒரு மையப்படுத்தப்பட்ட எக்ஸ்சேஞ்சில் அக்கவுண்ட் உண்டு. ஏனெனில் CEX-கள் பாரம்பரிய வங்கி உலகுக்கு எளிதான வரவு/செலவு வழிகளைத் தருகின்றன; உங்கள் வங்கிக் கணக்கிலிருந்து பிளாக்செயினுக்கும், திரும்பவும் எளிதாகப் பணத்தை நகர்த்தலாம். Ryan Sean Adams இதைப் பொதுக் கழிப்பறையைப் பயன்படுத்துவதுடன் ஒப்பிடுகிறார்: “உள்ளே போகிறீர்கள், வேலையை முடிக்கிறீர்கள், வெளியே வருகிறீர்கள்.”

இது நல்லது: ஒரு CEX அக்கவுண்டுடன் தொடங்கி, நம்பிக்கை வளர வளர மெதுவாக DeFi-க்கு மாறலாம்.

DEX-களின் ரிஸ்க்குகள்

DEX பயன்படுத்துவதிலும் ரிஸ்க் உண்டு. மிக முக்கியமான சில இங்கே:

🐞 ஸ்மார்ட் ஒப்பந்த ரிஸ்க்: ஆடிட்கள் ஸ்மார்ட் ஒப்பந்தப் பிழைகளின் வாய்ப்பைக் குறைக்கும், ஆனால் முற்றிலும் நீக்காது: 2025-இல், பல நிறுவனங்கள் ஆடிட் செய்த ஒரு பெரிய DEX, ஒரு நுட்பமான குறியீட்டுப் பிழையால் $128M இழந்தது. மோசமான சூழ்நிலையில் உங்கள் டிரேட் தொகை வரை இழக்கலாம். நம்பகமான, நன்கு ஆடிட் செய்யப்பட்ட ஸ்மார்ட் ஒப்பந்தங்களையே தேர்ந்தெடுங்கள்.

💰 செல்ஃப்-கஸ்டடி ரிஸ்க்: தனிப்பட்ட விசைகளுக்கு நீங்களே முழுப் பொறுப்பு என்பதால், திருட்டு, மோசடி அல்லது தவறவிட்ட சீட் ஃபிரேஸ் மூலம் ஒரு வாலெட்டை முழுமையாக இழக்கலாம். அதனால்தான் பல வாலெட் உத்தியுடன் ரிஸ்க்கைக் குறைப்பதும், சீட் ஃபிரேஸ்களின் நகலைப் பாதுகாப்பான, நிஜ உலக இடத்தில் வைப்பதும் முக்கியம்.

🥪 சாண்ட்விச் தாக்குதல்கள்: ஸ்வாப் ஸ்லிப்பேஜை அதிகமாக அமைத்தால், டிரேட் ஃபிரண்ட்-ரன்னர்கள் உங்களுக்கு எதிராக சாண்ட்விச் தாக்குதல்கள் நடத்தும் வாய்ப்பு அதிகரிக்கும். அப்படிப்பட்ட தாக்குதலில் உங்கள் ஸ்லிப்பேஜ் அளவு வரை இழக்கலாம். இதிலிருந்து எப்படித் தற்காத்துக்கொள்வது என்பதை எதிர்கால உள்ளடக்கத்தில் பார்ப்போம்.

இந்த நன்மைகளையும் ரிஸ்க்குகளையும் கருத்தில் கொண்டால், பின்வரும் நிலைகளில் ஒரு CEX உங்களுக்குப் பொருத்தமாக இருக்கலாம்:

• 🎓 கிரிப்டோகரன்சிப் பயணத்தில் இன்னும் ஆரம்ப நிலையில் இருந்து, ரிஸ்க்குகளையும் வெகுமதிகளையும் புரிந்துகொள்ள முயன்றுகொண்டிருந்தால்.
• ⚖️ உங்கள் டிரேட் அளவும் அடிக்கடித்தன்மையும் சிறியதாக இருந்து, பிளாக்செயின் கட்டணம் நடைமுறைக்கு ஒவ்வாத செலவாக இருந்தால்.
• 🏰 நிதிக்கு நீங்களே பொறுப்பேற்பதைவிட, ஓர் எக்ஸ்சேஞ்சை நம்பிக் காவலில் விட விரும்பினால்.

சிலர் கலப்பு அணுகுமுறையைப் பின்பற்றி ஒட்டுமொத்த ரிஸ்க்கைக் குறைக்கிறார்கள்: CEX-இல் கிரிப்டோகரன்சி வாங்கி விற்று, பிளாக்செயினிலேயே சேமித்து வைக்கிறார்கள்.

அறிவுச் சோதனை 7

மையப்படுத்தப்பட்ட எக்ஸ்சேஞ்சுக்குப் பதிலாக பரவலாக்கப்பட்ட எக்ஸ்சேஞ்சை ஏன் பயன்படுத்துவீர்கள்?

• [ ] மையப்படுத்தப்பட்ட எக்ஸ்சேஞ்சில் இல்லாத டோக்கன்களை அணுக.

• [ ] பரிமாறிய நிதி மீது முழுக் கட்டுப்பாட்டை வைத்திருக்க.

• [ ] வழக்கமாகக் கிடைக்காத கருவிகளையும் வாய்ப்புகளையும் அணுக.

• [ ] மேற்கண்ட அனைத்தும்

DEX தேர்ந்தெடுத்தல்

DeFi-இல் பல பரவலாக்கப்பட்ட எக்ஸ்சேஞ்ச்கள் உள்ளன; சில மற்றவற்றைவிடச் சிறந்தவை. எந்த DEX-ஐப் பயன்படுத்துவது என்று முடிவு செய்யும்போது இந்த ஐந்து முக்கிய அம்சங்களைக் கருத்தில் கொள்ளுங்கள்:

🥇 நம்பகத்தன்மை: நம்பகத்துக்கும் தரத்துக்கும் நீண்ட கால இயக்கத்துக்கும் அந்த நிறுவனம் நன்கு அறியப்பட்டதா?

⛲ பணப்புழக்கம்: விலைத் தாக்கத்தைக் குறைக்கும் அளவுக்குப் பூலின் TVL உயர்வாக உள்ளதா?

🖱️ பயன்படுத்தும் எளிமை: பயனர் இடைமுகம் எளிதாகப் பயன்படுத்தக் கூடியதா?

🔐 பாதுகாப்பு: ஸ்மார்ட் ஒப்பந்தங்களைப் பல ஆடிட்டர்கள் சோதித்துள்ளார்களா?

🎁 வெகுமதிகளும் வசதிகளும்: எக்ஸ்சேஞ்சைப் பயன்படுத்தவோ பணப்புழக்கம் வழங்கவோ விசுவாச வெகுமதிகள் உண்டா? கவர்னன்ஸில் வாக்களிக்க முடியுமா?

இந்த அம்சங்களில் சிறப்பாகச் செயல்படும் குறிப்பிடத்தக்க பெயர்கள்: Uniswap, Curve, Velodrome, PancakeSwap. உங்களுக்குப் பிடித்த சிலவற்றைக் கண்டுபிடிக்கும் வரை ஒரு DEX-இலிருந்து இன்னொன்றுக்கு எளிதாக மாறலாம்! இந்தப் பாடத்தின் குவெஸ்ட்டுக்கு, Optimism நெட்வொர்க்கில் நன்கு நிலைபெற்ற DEX ஆன Velodrome-ஐப் பயன்படுத்தப் போகிறோம். இது பயன்படுத்த எளிது; Layer 2-இல் இருப்பதால் கட்டணமும் மிகவும் நியாயமானது!

DEX சிறந்த நடைமுறைகள்

ஒரு dApp-உடன் தொடர்பு கொள்வதற்கு முன், உங்கள் நிதியைப் பாதுகாக்கச் சில சிறந்த நடைமுறைகளைப் பின்பற்றுங்கள்:

👩‍💻 அதிகாரப்பூர்வ திட்ட X (Twitter) கணக்கு (தங்கத் தேர்வுக் குறி) அல்லது நம்பகமான மூன்றாம் தரப்பு வழியாக dApp-இன் இணைப்பைச் சரிபாருங்கள், பிறகு அதைப் புக்மார்க் செய்யுங்கள். பல DeFi மோசடிகள் ஒரு போலி இணைப்பிலிருந்தே தொடங்குகின்றன, பிரபல தேடுபொறிகளில் கூட.

🔓 ஆன்செயின் டோக்கன் செலவு வரம்புகள் வழங்கும்போது, வரம்பை உங்கள் டிரேட் தொகைக்குள் அமையுங்கள். இப்போது பல DEX-கள் உங்கள் டிரேட்டை மட்டும் உள்ளடக்கிய கையொப்ப அடிப்படையிலான அனுமதிகளைப் பயன்படுத்துகின்றன: டோக்கன் செலவு வரம்புகளை நிர்வகித்தல் பாருங்கள்.

♟️ உங்கள் HODL வாலெட்டிலிருந்து dApp-களுடன் தொடர்பு கொள்ளாதீர்கள்; dApp-களுக்கு மட்டும் தனி வாலெட் வையுங்கள். வாலெட் உத்திகளை எங்கள் Web3 பாதுகாப்புப் பாடம் விளக்குகிறது.

இப்போது ஒரு பரவலாக்கப்பட்ட எக்ஸ்சேஞ்சுடன் தொடர்பு கொள்ளத் தயார்!

அறிவுச் சோதனை 8

நல்ல பெயர் கொண்ட DEX-ஐத் தேர்ந்தெடுத்திருப்பதை எப்படி உறுதிப்படுத்துவீர்கள்?

• [ ] அதன் நற்பெயரைச் சரிபார்த்து, நம்பகமான URL-களை மட்டும் பயன்படுத்தி.

• [ ] முதல் முறை ஒரு சிறிய சோதனைத் தொடர்பு செய்வதன் மூலம்.

• [ ] மேற்கண்ட இரண்டும்